YMA Day-ah YMA tan rilru i siam thar ang u

YMA chuan vawiinah YMA Day a hmang leh dawn a, kumin hi a kum 78-na a ni a, a din tirh ngaihtuah chuan tunah chuan pawllian leh ropui tak a ni tawh a, tun thlenga ropui leh chak tak a la kal thei hi a lawmawm hle a ni.

Kan ramah hian pawl hrang hrang a tam hle a, YMA anga pawl chak leh ropui, kum tam tak hnu pawha Mizo te tana la hlu telh telh, leh nghet taka la ding thei hi a tam lo hle a ni. YMA hi tun thlenga chak tak leh nghet taka a la din nachhan hi Pathianin Zofate a hmangaih vang a nih ngei a rinawm a, chutihrual chuan a dintute avang leh an dinchhan vang a ni thei bawk ang a, Mizo hnam hrang hrangte min suihkhawmtu, miharsa te \awngchhan, lusun khawhar te thlamuantu, \anpui ngaite puitu pawl a nihna hi a dinchan reng nachhan tam tak zinga pakhat chu a ni ngei ang.

Mi \henkhat ten YMA hi Pathianin Mizo te tan thil hlu tak min pek a ni an ti thin a, a dik hle awm e. YMA avanga kan ram leh hnamin hma a sawn zia te, mi tam tak nunna chhanchhuaktu a nihna te hi hmuh hmaih chi a ni hauh lo vang.

Mizo te hi ram zimte, a chhunga chengte pawh tlemte kan ni a, inlungrual lo tham pawh kan awm lo a ni ber. Kan ram hian kawng hrang hrangah chhanchhuah a ngai mek a, chuvangin \halaite hian tih tur kan ngah hle a ni. Kan ram tan hian \angkaina nei turin kan chak tawk tih kan inhriat thar a pawimawh hle.

YMA Day lo thleng hi kan khawtlang leh ram tana kan inpek tharna ni ni se, Zofate tana YMA hlutzia leh Zofate tana malsawmna a thlen nasat tawhzia ngaihtuah tharin, YMA hi Zofate kulhpui nghet a nih zel theih nan YMA vawnghimtu nih \heuh tum ila, YMA Member ni chunga YMA sawisel leh kher kher te hi YMA kan tihzahawm lohna leh kan tihnghinna a ni thei tih hria-in, chak tak leh huai taka YMA hi Zofate tana a kal zel theih nan a chhung a\anga a khalh ngiltu nih \heuh tum turin YMA Member ten vawiin, YMA din champhaah hian thinlung thar i pu \heuh ang u.