Kum engemawti kalta aṭanga Mizoram sawrkarin a lo kalpui tawh, Green Mizoram Day chu niminpiah khan hman niin, hemi ni hian thing ṭiak engemawzat phun leh a ni a, kum 1999 aṭanga kumin thleng hian Environment & Forest Department-in a hranpaa an thingphun chhiar tel lohin, Green Mizoram Day pual ringawta thing phun chu thing ṭiak nuai 26 chuang a ni ta a ni.
Green Mizoram kan kalpui dan hi kumtin kan uluk telh telh a, ruahmanna thar nen kan uar chho telh telh niin a lang a, tunah chuan thing ṭiak phun tam ai chuan enkawl nun a pawimawh zawk tih pawh kan hre chho tawh a, kan thing ṭiak phun te enkawl zui kawngah pawh hmalak dan tur ruahmanna kan nei ta hi a lawmawm hle mai.
Green Mizoram Day puala thing phunna atana kan sum senso zawng zawng hi chhut ta ila cheng nuai engemawzat chu a ni tawh ngei ang. Amaherawhchu, tun dinhmunah chuan kan sum sen tam zawk hi a thlawnin a luanral niin a lang a, a thlawna kan sum leh hun leh tha luangral zo zai hi thil uihawm tak a ni.
Nikum aṭang khan kan thing phun enkawl zui kawngah hma kan la ṭan a, amaherawhchu, a enkawlzuina lam hi thing phuntute ṭhahnem-ngaihnaah a innghat a, thing phuntuten ṭhahnem-ngaihna an neih loh chuan enkawl zui lohin a awm leh mai mai chauh a, hei vang hian sawrkar chuan sum engemawzat chu a khawhral phah a ni.
Green Mizoram hi hlawhtling taka kan kalpui duh a nih chuan sawrkar hian thing enkawl zuina tur hian sum pawh hi ruahman mai se, hemi pual atana sum tam tak luanraltir ai chuan a hlawhtlinna tur a nih chuan sum insen belh hi thil pawi lo tak niin a lang.