Lirthei chetsualnaa kan him nan i fimkhur tlang ang u

Nimin khan Lirthei khalh fimkhur hapta kan tih mai ṭhin, Road Safety Week hman ṭan a ni a, he hunah hian nikum chhung khan Police chhinchhiah danin lirthei chetsualna avanga nunna chan mi 97 leh hliam mi 281 an awm tih tarlan a ni.

Lirthei hi a pung chak hle a, kan kawng te a chêp si avangin lirthei khalhtute leh mipuite hi kan fimkhur telh telh a ngai niin a lang. Lirtheia chetsualna tam zawk hi lirthei khalhtute leh mipui lam fimkhur loh vang a ni.

Lirthei khalh ṭhin zingah fimkhurna tla chham tak tak kan tam a, kawng zim leh chep tak karah pawh chak zet zeta tlan ching te kan awm a, heng mite hi thiam an intihtawk vanga tlan chak an ni tlangpui a, amaherawhchu, thiam kan intih lai tak hi kan thiam loh lai tak alo ni duhkhawp mai. Tin, kan lo thiam tak tak a nih pawhin midang fimkhur lo kan tawng palh thei tih hria a, kan fimkhur kep a ṭha khawp mai.

Tin, lirthei dang lo tlan leh tlan loh ngaihtuah miah lova, mahni hmazawn zawna tlan ching te, Signal pek dan pawh hre mumal mang lo Professional Driving Licence nei zingah hian kan la awm  zel bawk si a, heng mite hi zirtirna mumal tak pek theih nise thil duhawm tak a ni.

Hei bakah hian lirthei khalhtute hian kan kawng a chep tih hria-in, kawngpui sira kan lirthei te kan hûn dawnin, lirthei dang tlanna tur kawngpui zau thei ang ber zuah tumin, kawng sir nek thei ang bera kan lirthei hun te pawh hi i ching ang u.

Mipui lam pawhin lirthei kan ngam mah mah ṭhin a, kawngsira kalna tur Footpath kan nei reng chungin motor kawngpuia kal tlat ching te kan awm a, tin, lirthei lo tlan kawng kian ṭha duh mang lo te hi kan awm ve tho bawk. Lirthei kan ngam lutuk vanga tawhsual kan tawk a nih chuan a na ber tur chu keimahni kan ni tih te pawh hi kan hriat thar hi a ṭul âwm e.

Tin, naupang tam tak, motor kawngpuia infiam ching leh thirsakawr khalh ching an awm a, nu leh pa te hian kan fa ten tawhsual an tawh loh nan motor kawngpuia infiam lo tur te, lirthei hlauh nachang hre turten kan fa te i zilh ngun bawk ang u