Internet kan hman danah kan fimkhur a tul

Tunhnaiah Zarkawt tlangval a bo a, nasa taka zawn a nih hnu-ah thiin hmuh a ni a, he tlangval bo zawn a nih lai hian thuthang diklo tak tak vawrh darh a nih bakah a ruang hmuh a nih hnu-ah a ruang thlalak vawrh darh leh hman a ni a, mahse danin a phal loh thil a ni a, a theh darhtute hrem theih an ni tia vauna thu thehdarh zui ve a nih tak avangin a ruang thlalak hi a darh zui lutuklo ta niin a lang.

Mi kan changkang tawh a, computer leh phone changkang tak tak nen internet hmangin thu leh thlalak midang hmuh theih turin kan pho chhuakin kan inthawn kual zung zung thei tawh a, hetianga awlsam taka thu leh thlalak pholang leh thawn kual thei kan nihnaah hian kan fimkhur a \ul takzet a, hetianga thu diklo leh thlalak mawilo tak tak te thawn chhuaktu kan nih avang hian awlsam takin thubuai kan awrh ve thei tih kan hriat hi a \ul takzet a ni.

Thil pawi engemaw a thlenin chumi chungchang midang hriata kan sawi (comment/post) danah thleng kan fimkhur a \ul a, fiamthu-a thu diklo kan sawi te pawh mi \henkhatin thu tak emaw tiin an lo vawrh darh zui chiam thei a, fiamthu sawia kan thu sawi avang khan thubuai kan awrh nawlh thei tih thleng hian kan hriat a \ul a, kan hmuh leh hriat zawng zawngte midang hnena hlan chhawn zung zung hi kan tan a him lo thei tih i hre thar leh ang u.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram