Niminpiah khan Govt. Serchhip High School-ah chhiatrupna lo thlen huna chêt lâk dan tur lem chan “Demonstrative Mock-Drill” hlawhtling taka neih a ni a, hetah hian lirnghing lo thlen thut palha awmdan tur an zir a ni.
Mizoram hi India rama lirnghing thlen theihna hmun hlauhawm ber (Zone V) an tih zingah a tel a, Zone-V tih awmzia chu ‘Magnitude 8 emaw a aia sâng emawa lir nghin theihna hmun’ tihna a ni a, lirnghing tehna hi a inthlau hle a, Magnitude 1 leh Magnitude 2 hi a let sawm vel zelin a innat hleih a, hmanni-a mi 8000 chuang thih phahna, Nepal lirnghing (Gurkha earthquake) kha 7.8-a na a ni a, Mizorama nghing theia ngaih Magnitute 8 hi Nepal lirnghing lêt thawka nâ kha a ni a, chuvangin 7.8 leh 8 hi a number-ah inthlau lo mahse lirnghingah chuan a inthlau hle tih kan hriat a ṭul.
Lirnghing thlen hlauhawmna hmuna awm kan ni tih hria-in sawrkar pawhin lirnghing vanga chhiatna alo thlen palha chet lâk dân inzirtirna a ngai pawimawh hle a, a taka tihchhinna (Mock Drill) pawh neih zeuh zeuh a ni a, a ṭha hle a, amaherawhchu, lirnghing na tak kan tawh thulha chet lâk dan tur inzirtir ai maha pawimawh, tih hmasak zawk tur kan nei niin a lang.
Mithiam te sawidanin, tun dinhmunah hian lirnghing na tak hi lo thleng ta se, Mizoram hian chhiatna rapthlak tak kan tawk thei dawn niin an sawi a, chumai piah lamah chhanchhuah hna thawh pawh thil harsa tak a nih dawn avangin chu chuan chhiatna nasa tak dang a thlen zui leh thei dawn niin an sawi a ni.
Hetiang hi a nih avangin lirnghing na tak lo thlen pawha chhiatna thleng thei tihnêp deuh theih dan kawng zawn hmasak hi tuna kan mamawh chu niin a lang a, in kan sak danah pawh lirnghing laka him ngei tura in sak a nih theih nan sawrkar lam aṭanga hmalakna emaw, khuahkhirhna siam a ṭul hle a, ṭhenawm te nena in kan insak hnaih lutuk te, duh chen chena sânga in kan sa te, tin, in sak sa tam tak te pawh hi lirnghing lo thlen palha anmahni mai bakah midangte tan pawha chhiatna nasa tak thlen thei tur a nih chuan ṭhiah ṭhentir emaw, ṭhiah vek emaw thlenga hma lak hial pawh nakina chhiatna nasa zawk kan tawrh lohna tura invenna ṭul tak niin a lang. Kan kawngpui zim lutuk te hi chhiatna lo thlen thulh pawha harsatna min thlen thei tur thil a ni a, chuvangin chhiatna alo thlen palh pawha chhanchhuah hna thawh a chak zawk theihna tur leh chakkhai mamawh te chak zawka lakkhawm a nih theihna atan kan kawngpui zim lutuk tihzauh te hi thil ṭul hmasa niin a lang a, kan khawpui chêp lutuk te hi siamrem a, khawpui tihzauh dan zawn pawh hi nakina kan la ṭhatna zawk tur niin a lang.