Lui dungah fimkhur a tul

Kumtinin Mizoram hmun hrang hrangah tui tla hlum thâwm hriat tur a awm fo a, hmanni lawkah pawh Serchhip tlangval chu Mat lui-ah chesualin a tla hlum a, a pawi hle a ni.

Hetianga chetsualna lo thleng te hi vanduai vang chu a ni ngei mai a, mahse fimkhur hian vanduaina lo thleng tur hi a vên theih a rinawm a, chutiang bawkin fimkhur loh hian vanduaina pawh a siamchawp theiin a rinawm bawk a ni.

Hetianga lui dunga chetsualna tam tak hi chu lui dunga intihlim paha kal te zingah a thleng nasa deuhin a hriat a, sangha man ṭhin leh eizawnna atana lui dung hmang ṭhin zingah pawh a thleng ve fo tho a, mahse a tam zawk hi chu picnic-a kal, pawlho-a lui dunga insu, leh ṭhianho intihlim paha kal zingah hian a thleng nasa zual em aw a tih theih a ni.

Luia tla hlum tam tak te hian kan lui dung hlauhawm zia an hriat tawk loh vang a ni fo a, khawi lai tuikhuah leh dil anga tui nêm leh dul emaw an tih vangin kan lui dung te an zuam sual fo a, kan lui kuang te a zim a, a hmun a awih avangin kan lui tui te hi a khauh viau ṭhin tih hriat a ṭha. Tin, ṭhianho intihlim paha kal te zingah ruih tawh hnua tui chên ching te an awm a, fimkhur lo taka tuia infiam ching te an awm a, hetiangah hian chetsual palh a hlauhawm duh viau bawk. Kan lui dunga tui tla hlum an tam tawh zia hriaa kan harh thar a ṭul a, puitling te pawhin naupang te hi anmahni chuan lui dungah i thlah zalen lo ila, kan hruai dawn a nih pawhin a hlauhawmzia i hrilh thar fo ang u.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram