Ramngaw leh nungcha humhalh kawngah tan la zel ang

Nimin kha International Biological Diversity Day niin Mizoramah pawh he ni pual hian hun hman a ni a, he huna Chief Minister thuchah an chhiar chhuahah Chief Minister chuan Mizoram chu zirmiten nungcha hausakna neihna hmun ‘biodiversity hotspots’ ah an ngaih thu a sawi a ni.
A ni taka Mizoram hi ram chhengchhia leh hmunhma rem lo tak ni mahse biodiversity lamah hian ram hausa tak kan ni a, kan ramngaw leh kan nungcha te kan humhalh ṭha lova, kan tichereu nasa viau chung pawh hian hemi kawnga ram hausa tak kan la ni thei hi a vanneihthlak hle a, chutihrualin, kan ramngaw leh nungcha te tichereu zawnga kan kal reng a nih chuan helama kan ram ngaw hausakna hian tawp chin erawh a la nei ngei dawn tih kan hriat a ṭul takzet a ni.

Kan nungcha leh ramngaw te humhalh zawngin sawrkar mai bakah tlawmngai pawl leh mimal ṭhahnemngai engemawzatten hma an la mek a, hemi kawngah hian nasa zawkin mipui mimirten ṭan kan lâk a ṭul takzet a ni.

Khawvela nungcha te hi inmamawh tawn, inring tawn, inzawmna / inkungkaihna nei vek kan nih avangin heng kan ram ngaw leh nungcha te kan humhalh ṭhat chuan keimahni tan nghawng ṭha a nei ang a, kan humhalh ṭha lo a, kan tihchereu zel a nih chuan he rama chêng mihring te bawk hi a tuartu tur chu kan ni dawn a, chuvangin kan ram hausakna neih sa tipung zel tur hian theihtawp i chhuah ang u.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram