Nimin khan Serchhip Bazar Buildinga chawhmeh zuartute bûkna hmanruate chu Legal Metrology Department ten an endik sak a, an bukna leh buk lungte uluk tak endik sak niin siamrem ngaite Legal Metrology Department lamin an siamremsak a, heng an bukna hmanrua te hi a ṭha thawkhat niin report a ni.
Sumdawngten bûkna leh tehkhawng an hman ṭhenkhat hian sawisel an hlawh fo ṭhin a, hetianga Serchhip Bazara sumdawngte bûkna leh buklung te endiksak a, siamremsak an ni leh a ṭha thawkhat nia sawi a ni hi thil lawmawm tak a ni.
Sumdawngte tan chuan an bûkna leh tehkhawngte endiktir hi thil ṭha tak leh mipuite hnenah pawh rintlak an nihzia an pholanna tur leh anmahni infak chawp lova an ṭhat tawkzia midangte hnena awlsam taka an puanzar theihna a nih avangin sumdawngte hian an tehkhawngte hi a endiktu tura sawrkar chhawr te hnenah hian endik tir fo se anmahni ngeiin hei hi an ṭangkaipui theiin a rinawm.
Hetihlai hian ‘endik’ tih ṭawngkam hman avanga thil diklo hmang pawh ni chuang si lova hlauh tlatna rilru pu hi awm ve theih a ni a, hei hi ngaihtuah thui tawk loh vang niin a lang a, kan hmanrua te hi alo rei tawh chuan kan khawih chingpen luih vang ni lovin alo diklo ve thei a, chuvangin endiktir a, a lo dik tawk lo a nih pawhin tihdikloh luih a ni kher lo tih a endiktute pawhin hriatthiam chin an nei a, a dik turin min lo siamremsak emaw, a dik hman dan tur min lo kawhhmuh mai dawn tih kan hriat a ṭul a ni.
Bûkna dik ngei hman hi sumdawngten an tih ngei ngei tur a ni tih hi mipui lam pawhin kan hriat thar a ṭul a, bûkna diklo hmangtute hi a sawiselna tur hmun taka thlen nachang pawh kan hriat a ṭul awm e.