Mizoram hi tlangram chheng chhe tak tak tamna a ni a, fur a lo thlenin leiminin nasa takin min tibuai ṭhin a, leimin vangin inkalpawhnaah harsatna kan tawk ṭhin a, in leh lo chân engemawzat an awm tawh bakah leimin vanga nunna hial chân ta pawh engemawzat an awm tawh a ni.
Kan ram hian kumtinin leimin hi kan tuar a, a kum telin kan tuar nasa cho zel pawh niin a lang a, hei hi a chhan nia lang chu kan hmasawnna-in a ken tel ti ila kan sawi sual lutukin a rinawm loh a, kan rama leimin zinga a tlem zawk hi chu khuarel chhiatna-in a ken tel a nih a rinawm a, leimin tam zawk hi chu mihringten kan siamchawp niin a lang a ni.
Mihring kan pung zel a, chenna in leh lo dinna tur hmun kan mamawh belh zel a, tun hmaa in leh lo dinna tlak lo leh din theihna hmun pawh ni lova kan ngaih hmun te pawh eng tin tin emaw kan rek a, in leh lo kan din chho ta zel a, hei bakah hian ramhnuai leh khaw dai velah eng kawng tur tur emaw kan lai chek chuk a, kawng tur mai bakah eng eng emaw atan tiin, a nghawng tur ngaihtuah lek lovin lei kan lai vûng terh turh a, kan tuihawk luanna tur mumal kan siam lova, mahni ram hrula luantir duh lova dan khawm luang zel te chu loh theih lohin hmun pakhat aṭangin kawrh lam pana a luan a ngai a, heng tuihawk tam tham tak luanna te hian nasa takin lei a hrut/khawh ral a, heng te hi leimin / lei tlahniam siamtu lian tak a ni fo a ni.
Kan ram hi tlangram a ni a, leimin duhna a ni a, leimin mai thei tur te pawh nasa taka kan vên a ṭul laia lei timin duh zawng hlir maia hma kan la zel a nih chuan kan ramah hian hmantlâk loh ram engemawzat kan insiamchawp thuai dawn a, chuvangin, kan rama hmasawnna hna kan thawh dawn pawhin leimin siam tlem theih dan tur ber ngaihtuah chunga hma kan lâk a ṭul takzet tawh a, mimal leh sawrkar te pawhin kan ram tichhe lo zawngin hma lâk i tum hram hram ang u.