Tunhnaia Serchhip Tuikhuah Veng leh Dinthar Veng leitlahniam ena lo kal PWD Chief Engineer (Highway) Er. K.Sawmvela chuan New Serchhip BRTF hmun hluia PWD SE (Highway) Office sak zawh tawh chungchanga zawhna a chhânnaah, National Highway-54 kawngpui siamṭhat turin Serchhip chu a hêl dawn avangin National Highway-in a paltlang lohnaa SE (Highway) dah chu a rem lo mai thei niin a sawi a ni.
He Building sak dawn hian helai hmuna dah duh leh duhlo hi veng mipuite an innawr nasa hle a, hetihlai hian PWD lam pawhin SE Office hmun tur an pek loh chuan Serchhip-ah an awm thei dawn lo tiin khawtlang hruaitute an kar niin sawi a ni bawk a, a tawpah chuan veng mipui tam tak rilru dam lo chungin khawtlang hruaituten Serchhipa SE Office dah a nih ngei theihna tur a nih chuan tiin helai hmun ṭha tak hi PWD tan an pe a nih kha.
Helai hmun PWD kuta an pek hnu-ah Building pawh an sa zui nghal a, an sak zawhna pawh kum khat chuang a liam leh tawh a, tun thlengin luah a la ni lova, tunah phei chuan he building sak chhan ber PWD SE (Highway) chuan an luah loh hmel ta bawk si a, tuten nge luah dawn a, engtikah nge an luah dawn tih pawh hriat lohin sum tam tak senga building sak zawh tawh chu kan khawpui chhungah a awm ta mai mai a, tute pawhin luah dawn se, an luah dawn tak tak chuan sum tam tak sengin chei ṭhat leh a ngai ngei ngei dawn a ni.
Hetianga sawrkarin sum tam tak senga a sak zawh tawh building luah mumal loh hi Serchhip-ah hian a awm nual a, ruahmanna nei chunga sawrkarin sum tam tak senga building a sak te an sak zawh tawh hnua an ruahmanna siam anga an awm leh ṭhin lo hi sawrkar tan sum tam tak sen thlawnna a ni a, hei hi mipui zahlohna lian takah a ngaih theih bawk a, chuvangin sawrkarin ruahmanna a siam bawhzuia sum tam tak a sen tawhna te hi chu ruahmanna awmsa ang hian kal ni ṭhin se a duhawm khawp mai.