Zothlifim Logo
Loading ...

Sawrkar hmalakna hnuaiah Serchhip khawpui chuan hmasawnna kawng kan zawh chho mek a, Serchhip hmasawnna hna thawh zawh tawh te a awm a, nimin lawkah pawh DRO Office building thar hawn a ni a, vawiinah pawh Auditorium hawn a ni dawn a, heng bakah hian kan khawpuiah hmasawnna lian tham tak te pawh thawh chhoh mek a la ni zel a, hna thawh tur hmachhawp te pawh a la awm bawk a, kan khawpui hmasawnna atana ruahmanna te pawh engemawzat a la awm mek bawk a ni.
Hetianga kan khawpuiin hmasawnna kawng a zawh chhoh mek lai hian kan khawpui hmasawnna kawngah hian mipuiten mawhphurhna sâng tak kan nei a, kan khawpui hi ṭha taka thuam tum nimahse mipuiin kan zir loh chuan tih theih loh chin, hmasawnna-in a thlen theih loh chin a awm ve thei a, kan khawpuia hmasawnna hnathawhna atan sum tam tak awm mahse mipui lamin kan zir loh chuan heng sum te hi ho deuhin a luangral emaw, hman hleih theih lohin a awm thei tih kan hriat a ṭul a, mipuiten kan zir loh chuan kan khawpui hmasawnna hnathawh turte dâltu chu mipui lam te pawh kan ni zawk ve thei tlat a, kan neih tur thil tam tak pawh kan chân phah thei tih kan hriat a ṭul takzet a ni.

Chutihrualin, kan khawpui hmasawnna hming pu ve siin, kan khawpui chhunga sum tam tak sênna te hi a khaw mipuite tana ṭangkaina awm lo leh hnem hnânna tur awm lo, kan khawpui tana hnawksak leh kan khawpui tichhetu thil te pawh sak a ni ve thei bawk a ni.

Chuvangin, kan khawpuiin hmasawnna kawng a zawh chhoh meknaah hian mipuiten kan khawpui tana ṭha ber tur thlir chunga kan ngaihtuahna te kan sên a ṭul tak zet zet a, he khawpui hi kan tu leh fa te chên chhunzawm zelna tur a nih avangin he khawpuiin hmasawnna kawng a zawh chhoh danah hian tuna mite hian ngaihtuahna kan sên nasat a ṭul takzet a ni.