Nimin atang khan Serchhip leh Keitum inkara Bawngchawm ram atangin Pre World Cup Mizoram Open Paragliding Accuracy Championship 2018 chu neih tan a ni ta a, mipui pawhin an hlut hle niin a lang.
Serchhipa Paragliding neihna hmun hi a hriaten an sawidan chuan India ramah pawh a tha ber pawl leh Paragliding neihna atana hmun him ber pawl niin an sawi a, hetiang hmun Serchhipin kan nei hi kan vannei hle a, chutihrualin kan hmunhma tha tak neih hi Serchhip mipuite hian kan chhawr tangkai tawk lovang tih chu a hlauhawm viau a ni.
Paragliding hi duhna hmun hmuna neih ngawt chi a ni lova, hetianga hmun tha kan neih te chhawr tangkai tur chuan a hmunhma neitu leh awmchilhtu Serchhip mipui zingah a chhawr tangkaitu tur kan inchher chhuah hi kan tihtur hmasa niin a lang a, khaw dang leh hmun dang atang chuan a khât tawka min rawn hman tangkaisak bak an rawn hmang tak tak dawn lova, tin, hmun dang atanga an hman duh hunah a a bul atanga a hmunhma cheibawl that leh zel a ngai thin dawn a ni.
Mizoram mai bakah India ramah pawh hmun thaa an sawi, helai hmun hi Paragliding neihna hmun nghet atan cheibawl niin, chumi luahlum tur chuan Serchhip thalaite chher chhuah ni thei se a duhawm khawp mai.
Hetianga helai hi paragliding neihna hmun ngheta siam theih a nih chuan intihhlimna atana paragliding chuang duh khawtual mi bakah hmun dang atanga lo kal, tourist te pawh an awm ve reng ang a, tin, helai hmun hi paragliding zirna kalpuina hmunah te hial siam theih hun te a la awm ang a, chutianga tih theih a nih chuan glider/pilot te mai bakah a veivahna tur lirthei neitute leh hotel leh restaurant siam te leh midang engemawzat te sum lakluh a pun phah ang a, Serchhip economy chawikangtu pakhat ni turin he hmun hi a siam theih dawn niin a lang a, chuvangin, helai hmun hman tangkai dan hi sawrkar emaw, association lam emaw mai bakah Serchhip khawtlang hruaitute hian ngaihtuah thei se a duhawm khawp mai.