Khawvel pum ah vaihlo hian mihring nun a suat nasa em em a, Second 7 danah mipakhat zel nunna la anga chhut niin vaihlo vanga thihna hi pumpelh theih si ah chuan thihna thlen hnem ber tu a ngaih a ni a, khawvel puma kumtling mi sawm zela pakhat hi vaihlo vanga thi anga chhut an ni bawk. Heti khawpa chhiatna leh thihna thlen nasa tu anih hria in World Health Organisation chuan 31st May hi World No Tobacco Day ah puangin kumtin khawvel pumah he ni hi vaihlo do na leh a that loh zia inzirtirna ni atan urhsun tak in a hmang thin a, Mizoram ah pawh theih ang tawkin he ni hi kan lo hmang ve thin a ni.
Tin, WHO chuan kum tin World No Tobacco Day atan hian thupui (Theme) tha tak tak a duang chhuak thin a, heng thupui (theme) zulzui hian he ni hi hman/observe thin a ni a,kumin ah pawh hian vaihlo fakmawi na khap chungchang rawn thlur bingin World No Tobacco Day- 2013 thupui atan “ Ban tobacco advertising, promotion and sponsorship “ tih chu a rawn thlang chhuak leh ta a ni.
1.WNTD – 2013 Thupui “ Ban tobacco advertising,promotion and sponsorship “ in a tum tlangpui te :- He thupui in a tum ber chu tobacco industry ten vaihlo fakmawi na leh tih hmingthanna chi hrang hrang hmanga mihring tam thei ang ber vaihlo hman tir an tum na hi khap a, vaihlo la hmanglo te leh hmang mek te pawh he inbumna lak atanga venhim hi a ni. Tobacco industry hrang hrang te chuan vaihlo hmang mek tute hi vaihlo kaihhnawih natna hrang hrang avangin an boral thuai dawn ani tih hria in theihtawpin naupang leh thalai zawk te leh vaihlo la hmang lo te vaihlo hmantir hi an tum ber a ni a, tin, vaihlo sim tuma tan la mek tu ten sim harsa an tih a an chak leh zual a an it theih tur ang ber a vaihlo leh a kaihhnawih fakmawi a chhawpchhuah sak hi an hna pui ber a ni. Hemi a nih a vang hian vaihlo fakmawina khap hian khawvel mipuite vaihlo hman kawng ah nasa takin a veng theih a ni tih hria in he thupui hi thlan chhuah a ni.
2.Vaihlo fakmawina chungchang a India Sorkar in hma a lo lak tawh te :- India Sorkar laipui chuan kum 2003 daih tawh khan vaihlo khuahkhirhna dan The Cigarettes and Other Tobacco Products (Prohibition of Advertisiment and Regulation of Trade and Commerce, Production, Supply and Distribution) Act, 2003 atawi zawng a COTPA kan tih mai chu a lo siam chhuak tawh a, he dan hnuai a Section – 5 chuan vaihlo leh a kaihhnawih hrang hrang fakmawi a lo khap tawh a ni.
He dan bawhchhetu chu Section -22 na hmang in Kum- 5 thleng lungin tan tir a Rs 5000/- thleng chawitir theih an ni. Tin, COTPA, 2003 tihlawhtling a ti phuisui lehzual tur hian amendment rules tha tak tak siam zui zel bawk a ni.
3. Mizoram Section – 5 of COTPA 2003 hnuai a dan bawhchhiatna hrang hrang te :- Kan ram a section 5 bawhchhiatna langsar tlangpui te chu –
(a) Vaihlo fakmawina board (Point of Sale Board) dan in a phal ang chin pel a siam luih hmuh tur a tam em em thin em em a, heng board te hi vawiduailo lak thlak tir thin ni in tun dinhmun ah tak chuan heng point of sale board dan kalhte hi kan state ah hian hmuh tur a awm tawh manglo a ni. Point of sale board dan phalloh te chu vaihlo brand hming (brand name), vaihlo bur lem (brand pack shot) lang tel a siam te, a size bituk, 60cm x 45cm aia lian te leh colour leh engthei a siam te an ni.
(b) Advertisement Poster hrang hrang te hi dan bawhchhiat na langsar tak a ni a, COTPA dan chuan eng advertisement poster mah tar a phal lo a ni. Amaherawh chu kan ram ah hian tobacco company te bul tum in heng dan in tar a phalloh vaihlo fakmawi na poster hrang hrangte hi hmuh tur a tam em em a, thenkhatte phei chu dawr/ in neitute remtih na pawh la hmasa lemlo in an bang ah an tar sak chuai chuai thin a, hei hi dan bawhchhiat na a nih avangin heng poster lo intar avang hian dawr/in neitute hian hremna kan tawh theihphah a vangin mipuite pawh hemi kawng a kan lo inven a, lo en liam mai mai lo a tar kan lo phal loh emaw a awmsa tepawh kan lo pawh thlak thuai thuai a ngai a ni.
Heng poster hrang hrang hmang hian tobacco company te hian an sumdawn na theh darh a an product mipuiten an it theih tur ang ber in an rawn pholang thin a ni.
(c) Cable TV Programme hmang a dan bawhchhiatna :- Mizoram ah hian Cable TV kaltlang in TV program, flim leh music video hrang hrang ah meizu lai lang hmuh tur a tam em em a, a bik tak in hnamdang flim lehlin an chhuah thin ah te hmuh tur a tam zual thin a ni. Heng hi dan phalloh a nih avangin Cable TV te pawh he dan hi khauh tak a zawm tur a tih an ni. Tin, COTPA ( Second Amendment) Rules, 2011 in a tarlan dan in lohtheih loh a Film leh TV Programme a tobacco products leh hmang lai lem lanna a awm a pawimawh in a ngai talh a nih chuan U/A Certificate, Central Board of Film Certification (Film tan) leh Ministry of Information and Broadcasting (TV Programme tan) te hnena lak phawt a ngai a ni. Tin, film leh TV programme zawng zawngah hian vaihlo hmang lai lem leh vaihlo product hrang hrang tih lan tel a tulna leh pawomawhna ‘editorial justication’ chiang taka lantir a nih bakah Anti Tobacco Health Spots/Message 30 seconds chhung tih kan tur a ni. Hemi bakah hian langsar taka scroll hmanga anti-tobacco Health Warnings screen hnuai tihlan bakah TV Programme/Film a concerned actor/ changtu berin vaihlo hman thatlohna (Disclaimer) 20 seconds chhung an tarlang ngei ngei bawk tur a ni. Mipuiten a chunga dan bawhchhiatnaa hrang hrang kan tarlan lo hmu an awm chuan District tina Deputy Commissioner te hnenah leh Mizoram State Tobacco Control Society Office, Zemabawk ah complaint thehluh theih reng a ni.
4. Surrogate Advertisement:- Tobacco Campany ten mipuite bumna tura bumna (tactic) hrang hrang an hman te zingah chuan surrogate advertisement hia ngaimawhawm berte zinga mi a ni awm e. Hetiang adverisemet hmang hian nas taka mipuitr bum thin kan ni a, a bik takin ziak leh chhiar a hniam deuh te phei chu bum kawi kan awl lehzual a ni. Hetiang fakmawina hmang hian vaihlo product hrang hrang te chu hming dang daih hawhin emaw product dang te nena hming in ang teuh deuh hmangin emaw hming in ang si a funna/bawm dang deuh te hmangin an thehdarh thin a. Hetiang vaihlo telna leh tellohna inchawhpawlh nuaih hi mipuiten ngaihpawlhin tum loh takin an thil ei/hman te chu vaihlo tello emaw tiin an hriatloh lain vaihlo an lo hman phah thin a ni.
Heng hi a bik takin naupang te tan a hlauhawm em em a, thil itawm leh him taka lang, mahse an tan chuan tur lo ni reng si avang hian ku naupang tak atangin vahlo an lo addict phah their eng a ni. Tin, tobacco company te hian an product hming hrang hrang hmangin midang programme te an sponsor thin a, heng zawng zawng hi vaihlo promote na leh fakmawina ani ni vek tho a ni.
5. Vaihlo zawrh/pholan dan kawnga dan bawhchhiatna: COTPA dan chuan vaihlo product reng reng kum tlinglo tena awlsam taka an lei theih leh it theih tura zawrh hi a khap a ni. Hemi awmzia chu tobacco products te ualau leh langsar taka hralh tura pholan tuarh a phal lo a ni. He khapna in a tum ber chu kum tling lo te vaihlo leh a kaihhnawih awlsam taka an awh a, an lei mai theih lohna tura a zawrh dan leh chhawpchhuah danah fimkhur a ni. Vaihlo leh a kaihhnawih zawrhdan a bituk neih hi a bik takin kum tlinglo te tan a pawimawh em em a, achhan chu heng product te hi itawm taka pholan a nih chuan naupang ten tih ve chin a chak phah thei a ni.
Tlangkawmna: Mizoram hian vaihlo fakmawina khap kalpui hi engtiang takin nge a mamawh ve le? – India rama State zawng zawng zingah Mizoram hi vaihlo hman kawngah kan sang bera, Global Adult Tobacco Survey 2009-2010 in a tarlan danin Mizo mipui 67% lai te chuan vaihlo kan hmang a ni. Tin, vaihlo kaihhnawih natna hrang hrang, a bik takin cancer vei kawngah Mizo mipuite chu kan sang hle a ni. Tin, zirchianna/survey thar berin a tarlan danin cancer zawng zawng belhkhawm ah, hrawk & hnar, chuap, pumpui, chaw dawt, chhul hmawr leh Myeloid Leukemia (thisen cancer chi khat) ah pakhatna kan ni mek bawk a ni. Statistical Abstact of Mizoram 2011 issued by Directorate of Economics & Statistics, Government of Mizoram in a tarlan danin Mizo mipuite thihna tam ber chu vaihlo kaihhnawih natna in a thlen a ni.
Hei hi kan hnam dinhmun a nih avangin khawvel puma ram hrang hrang te kal rem a World No Tobacco Day pawh hi urhsun taka lo hman ve thin hi kan tihmakmawh a ni.