Milem Biak Chungchangah Pastor-te Inrawlh A Hun:Rualkhuma Hmar

Kan Chief Minister ni lai Pu Lalthanhawla’n Hindu Sakhua serh leh sang a lo ti ve ngei niin hriat a ni a, amah pawhin a pha lo, a rinna chu amah leh Pathian inkar a nih thu a sawi a. A dik ang.

Hetia Hindu Sakhaw tih dan kan va tih ve hian Kristian-te tan a pawi nge pawi lo, ban 10 nei hmaa a be tute tihdana kan va tih ve hian, an sakhaw tihdan (Bindi) zawm a, chal ka va tih sen tir ve khan an sakhua ka va zawm ve ta tihna a ni nge ni lo? India ram chu sakhaw zalenna ram a ni alawm tiin ram hruaitu kan sawisel ngam loh chin te tan chuan va tih ve a pawi lo, a thiang kan ti a ni mai thei e. Engang chinin nge mi sakhaw tihdan va ti ve se kohhran in a hriatthiam chin tur ? Secretary, Director chin te em ni ang?

hawla&RiiKan kohhran upa te hian vai ramah Hindu sakhaw tihdan va ti vein, Coconot sawhkeh se, chal hnawih sen se milem a be hran lo, amah leh Pathian inkar a ni kan ti dawn em ni ang? Party anga milem a bia, a be lo tih hi chu kan Party ṭan zawng a zirin kan inhnial reng ang ….. chuvangin kohhranin eng chin nge milem bia a tih tih hi an hrilhfiah vat a tul ta ber a ni. Kan Missionary ten hnam dang ringlo mite Baptisma an chan tir hian kan sakhua (Kristian) an rawn zawm ve ta angin report kan dawng thin a, ring thar 20 kan nei, 30 in Baptisma an chang kan ti a, inhnialna a awm lo. Kristian-ah kan ngai mai. Keini Kristian ten Hindu sakhaw tih dan kan va tih ve hian a pawi lem lo tihna nge, pawi chu a pawi a, a mi a zirin an chungah Kohhran in action a la ngamin a la ngamlo mai? Kan pastor-ten an hrilhfiah vat loh chuan tul lovah kan buai thui viau thei.

Thil lo lang ta chu kan Kristian-na aiin Politics-a kan ṭan lam kan thlang zawk a ang ta hle mai. Tunlaia kan boruakah pawh hian kohhran a che har lutuk a, kawng zawh hial a thlen phah a. MNF Party chuan an mi leh sate nasa takin a chawhphur phah a, nidang zawng aiin thawhlawm khawn pawh a nuam an tih laiin Congress Party chuan kawngzawhna awmah an ngai lova, chuvangin Puithiam Aw kan hre duh ta a ni. Anni an ngawih reng chuan pawi an ti lo tihna emaw ah mipuiin an ngai dawn a ni. Nakinah Coconot sawhkeh, ban 10 nei hmaa inhlan, chal hnawih sen duh an la awm hunah kohhran-in an chunga action lak tur nge lak loh tur. Action lak tullo ti tehreng pawh nise, pawi a ti nge ti lo? Kohhran a inngaihtuah mek lai hian kan Rev. Chuauthuama te, Upa Dr. Rokamlova te, an sawi Dr P.C Biaksiama te hian rawn hrilhfiah hmasa phawt teh se.

Kan Magistrate lar tak pu K.L. Liana te pawl UPC-ah hian R.Thangkanglova nen tuia hnimphumin Baptisma va chang ta ila, unau nu, unau pa tiin in ko ta bawk ila, kan nupui ten lukhum var khum se, miin ‘UPC in ni’ min ti ta se, engtinnge kan chhan ang. Pu KLA chu a lawm phian lawng maw? ‘E, nangni pahnih meuhvin hnimphuma Baptisma in chan chuan nuai chuang lai hlawh ka ni bawk alawm, Vawk kan talh ang e’ a ti hial awm asin.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram