Zothlifim Logo
Loading ...

Kum 78 tling ta YMA hi mizo zingah kan ngaihhlut dan a inchen lo a nih pawh hre thlawt chu kan awm awm love. Ram pawn lam mi Mizoram rawn tlawhtute mit la tak ni thin chu YMA colour – a dum, a var, a sen te hi an ni. He rawng hi hmun tinah hmuh tur a awm a, kan kawngka chungah nen lam YMA chhinchhiahna hi kan tar fur mai a, kan hnam chhinchhiahna emaw tih mai awl tak tur a ni.Sorkar ni bawk si lo, sorkar leh company te anga sum leh pai hmuhna nghet nei ni bawk silo, heti taka a lar leh rinrawl a ni te, khaw pui leh thingtlang hmun tin maiah a puala hall, park leh ram zau tak tak nei thei a ni te hi thil mak tak chu a ni ve reng a ni.

Thil kawng hrang hrangah hmatheh leh rinrawlah a tang a, thenkhat tan phei chuan ninawm leh hnawksak chan a chang lek lek thin a. Ruihhlo do kawnga a hmalaknaah sorkar laipui chawimawina Rs nuai 4 keng tel dawng tura thlan a ni a, hei hi thil ropui leh chhuanawm tak a ni E/Roll siamthat a ni emaw, engemaw dawng tur thlan thuah emaw, hnathawh leh hmalakna kawng tinrengah YMA tih a nih chuan ‘dik’ tura ngaih a ni thin. Chutiang a nih avang chuan a tih tur awm loh nia lang thleng pawha inrawlhtir a hlawh a, tul lem lo nia lang thlenga biakrawn leh ngaih pawimawh a hlawh hi a rintlak vang a ni.

YMA hi pawl pakhat mah nise, hruaitu tam tak nei a nih avangin chu’ng hruaitute ngaihdan sukthlek in ang lo tak tak te chuan an ngaih pawi mawh lam lam nawrin, kawng hrang hrangin hma an la a, hemi avang hian YMA hian lan dan hrang hrang a nei a. Thenkhat tan hruaitu nih chu phurrit leh ninawm mai anga a lan theih laiin, thenkhat tan chuan thuneitu anga chetna hun remchang a ni thei thin bawk. YMA chuan enge a nih ? eng mi nge a nih a, eng hnam nge a nih ngaihtuah lovin “Tanpui a ngai em ?’ tih chu a hmalakna tura tehfung pawimawh ber a ni a. Chhiat tawk leh tanpui ngai an awm chuan Samari mi tha ang bawkin a kalsan thei ngai lo.

‘He pa chu a YMA mang e’ kan tih hian hlawkna um lova midang tana inpe thei, zai dawh leh thin nel tak. A sawi leh rel ngawta duh tawk lova a taka thawk peih a ni tihna a ni. Tun hmaa zirlaibu pakhatah khan ‘Science chu a tiha tih a ni’ tih a awm a, chutiang bawk chuan YMA chu theory aia practical uar thin, thlamuanna thu a hnem mai lova thlamuanna tura a thawh a thawk thin a ni. YMA mawina chu necktie leh tlereuh a ni lova, tanpuina kut thawh hi a ni a. Kum 78 lai ni ta ni ta chu kalphung leh zia pawh a thlak hret hret a, a zepui ber erawh chu hnam ze humhim chunga tanpui mamawh apiang tanpui hi a ni.