Skip to content
Home » Chanchinthar » Serchhip-ah Gas Home Delivery kalpui a ni ve dawn ta

Serchhip-ah Gas Home Delivery kalpui a ni ve dawn ta

— Laldinpuia —
Secretary, Serchhip District Consumer Association

“LPG chu delivery man chuan customer address dik takah Gas chu deliverin Customer hmuh lai ngeiin a buk a dik ngei a ni tih a tifiah ang” tiin LPG Marketing Guidelines 2018-ah chuan inziak thlap mahse, Mizoram-ah chuan Gas sem danah hma kan la sawn thei meuh lova. Sawrkar lamin a ngaihsak tawk loh vang nge mipui lamin kan chanvo kan hriat tawk loh vang zawk?Hmun tam takah chuan buk pawh buk lohvin a semtuten dan lo angin an sem hmiah hmiah a la ni ber a. Mahni inlum ngeia Mizo mipui ten Gas buk dik leh him kan dawn theih hun hi a nghahhlelhawm tak zet a ni. Hetih lai hian Mizoram sawrkar ruahmannain Mizoram hmun thenkhatah Home Delivery system kalpui tan a ni a, Mizoram sawrkar chuan IOC rate bakah Rs 70 belhin Mizoramah Gas Home Delivery tih theih anih thu thuchhuah a siam tawh bawk a.

Sawrkarin thuchhuah a lo neih tawh bawhzui hian Serchhip District Consumer Association te chuan Serchip Town a Gas Home Deliver anih theih nan theihtawp kan chhuah a. Mizofed leh Supply Directorate lam te thurawn lain an ni remtih angin Serchhip a mipuiin Home Delivery an hlawkpuina tur ni a kan hriat veng thlanbik 3-ah Home Deliver anih theih nan hma kan la a, an khawtlang hruaitute kan be rawn hlawm a. Heng veng 3 a an khawtlang hruaitute hnenah Gas Home Delivery kalphung leh mipui tana a that zawk thu te theih ang angin kan sawi darh a, mahse mumal taka chhanletna leh hmalakpui atana min sawmtu kan neih chu Serchhip P&E Veng te hi an ni.

Serchhip P & E Veng huamchhunga Gas Home Delivery tih a nih ve theih nan hian Serchhip Consumer Association te chuan theihtawpin hma kan la zui a, ni 14.01.2022 zingkarah P&E Veng YMA Hall-ah P&E VC member, YMA OB leh Consumer ten sawihona hmasa ber kan nei a. Hemi hnuah hian P&E YMA Hall-ah ni 20.01.2022-ah Serchhip Mizofed te nen Public Meeting neiin Gas Home Delivery chungchang sawi a ni a, mipui ngaihdan lak a ni bawk a. Ni 28.03.2022-ah Consumer Association, Mizofed Manager leh P&E YMA OB ten inrawnkhawmna kan nei leh a, Gas Home Delivery atana ruahmanna hrang hrang te siam zui a ni.

Hetianga hma kan lak zui zel hnuah hian a hlawhtlinna hmu chho zelin P&E veng lam pawh Gas Home Delivery tur hian an inpeih thawkhat tawh niin hriat a ni a, hei vang hian ni 10.05.2022(Thawhlehni) hian Serchhip a bul tan nan Serchhip P&E Vengah Gas Home Delivery chu Mizofed ten an ti dawn ta a, a hawnna programme neih a ni dawn ta a ni. Serchhip P&E venge Home Delivery system hi a hlawhtlin chhoh dan a zirin Serchhip khawchhung hmun dangah pawh ti tura hmalak zel tum a ni bawk.

Gas Home Delivery chungchanga pawimawh langsar zual te:

  1. Gas Home Delivery a kalpui anih tawh dawn avangin Serchhip P&E area-ah Point Delivery a Gas sem tihtawp a ni tawh ang. Home Delivery duhlo an awm anih chuan an veng thenawm hnai bera Point delivery atangin Gas an lak a ngai tawh ang.
  2. Gas man tur hi IOC rate atangin Home Delivery charge Rs 70 belh zel tawh tur a ni. Point Delivery-a Gas kan lak hian IOC rate atangin Mizofed ten an delivery charge Rs 7.53 an belh leh zel thin a, mahse Home Delivery ah chuan Mizofed in a hranpain Point delivery charge an belh tawh lovang. A awmzia chu tuna Point delivery a Gas kan lak hian IOC rate+Rs 7.53 hi kan lakna rate a ni a. Home Delivery ah chuan IOC rate+Rs 70 a ni ang.
  3. Serchhip P&E Area-ah hian Gas sem dan routine hranpa a awm tawh lo ang a, Gas mamawh apiangin an duh hun hunah online in an book thei tawh ang a, a book hmasak indawt dan a zirin motor in a phurh tawk chinah gas hi deliver zel a ni tawh ang.
  4. P&E Veng area a Gas Home delivery a lei ten an Gas lei a buk a tlin leh tlinloh a deliver tute an buktir zel thei ang a, a buk dik leh tling chauh an la ang.

Tunlaiah Gas man a to tawh a, a buk tlinglo a tam bawk a, chuvang chuan LPG Home Delivery System hian Gas khawih chingpen leh buk diklo a mipuia hralh thin sukiang tura beisei a ni a. Consumer te tan mahni inlum ngeia kan mamawh Gas supply kan hmuh theihna tur anih bawk avangin Home Delivery System hi tuna Point Delivery kan kalpui mek aia hlawk zawk tura beisei a ni.

Leave a Reply

This site uses Akismet to reduce spam. Learn how your comment data is processed.