Govt. Serchhip College hi Mizoram College Campus hmunhma ṭha ber pawl a ni a; sawrkarin College ti changtlungin ti lian dawn pawh ni se, an hmunhma neih hian a la zo khawp mai. Chutih laiin, hmun danga College ṭhenkhatte hi chu tih lenna tur sum pawh awm se, an hmunin a zawh tawh loh hrim hrim avanga tih len belh vak ngaihna awm lo hi an awm nawk tawh ang.
Ram laili-ah kan awm a, nakinah chuan kan College hi Mizorama College pan hlawh ber a la ni thei dawnin a lang a; chumi tur chuan a hmunhma hi chuan theihna a nei a, tunah pawh NAAC-ah chuan Mizormah an champion tawh phawt a ni. College dangte tih ve ngai loh thilah hma thar an la reng bawk a, tun anga hma an sawn chho zel a nih chuan nakin lawkah chuan Zoram dung leh vang mai bakah, state pawn aṭang thleng pawhin zirlaite’n an la rawn bawh hum hum lo ang tih a sawi theih loh.
Tun apangin sawrkar tan pawh ngaihsak loh theih lohin an awm tan tawh a, Chief Minister pawhin an mamawh em em Administrative Building sakna tur chu phal takin a pe nghal pang mai.
Tunah hian District Hospital sakna tur hmun atan Bukpui ram sam fai a ni a, a lawmawm khawp mai. Tuna kan hospital awmna sa hi tun dinhmunah chuan mipui tan pan a nuam zawk ngei ang; mahse, nakin hun tur thlirin, hmun dang hospital-te changkan ruala changkan ve zel, ṭhan ve zel kan duh a nih chuan a hmunhma ṭha leh zau zawk kan neih hi a ṭul tawh hle a ni.
Kan Hospital hmunhma-in kan duh thu a sam loh avangin Lawibual ramah te sawn kan tum uaih uaih tawh a; mahse, a rem leh ta lo mai pawh a. Kan hmunhmain a zir loh avangin tunah pawh District dang hospital building neih ang pawh kan nei pha ta lo a nih hi.
Kan hospital ram hi damdawi in sakna atan chuan a la zau, khum 100 awmna chu a la leng kan ti a, khum 100 leng ngawr ngawr chuan sak a har lo khawp ang. Amaherawhchu, building dang ṭhiah rem si lote a awm nawk tawh a, a hmun ngaia sak a nih dawn chuan a tawt sa ṭûna sak a ngai dawn a ni. Health Deptt. ram pumpui hi la ruak vek chu ni se, ruahmanna fel tak nen nuam takin a la sak theih tih a chiang a; mahse, tunah chuan chu chu a theih tawh si loh a ni. Hospital building pawh hi a sakna tur hmunah hian tih len belh hleih theih tawh loha sak a ngai dawn sa tih a chiang a ni.
Tuna hospital building thar dahna tur hi a panna a hla tih hi tun dinhmun kan thlir vang niin a lang a, NH-54 an siam zawh hunah chuan Baktawng, Khumtung, Thingsul aṭang pawhin an rawn thleng zung zung thei dawn a; Zemabawk leh Aizawl Civil Hospital inkar te, Kulikawn aṭanga Falkawn inkar ngaihtuah phei chuan tuna kan damdawi in awmna leh Bukpui ram chu inhnaih hleih tak a la ni.
Tuna kan damdawi in pantute pawh a tam zawk chu lirthei hmanga pan khawm kan ni a, a panna thuah hi chuan harsatna kan neih ka ring chiah lo. Hospital hi a ngaiah sa ta ila, kum 5/10 chhungte chu kan la inhnawh ve naw naw thei ngei ang; mahse, nakina mamawhna avanga tih len a ṭul hun a lo thlen hunah chuan a khirh ṭalh tawh dawn.
Hospital hran din belh te hi pawisa awm vanga tih mai theih ni lovin a lang lehnghal a; chuvangin, “A hmun ngaiah chuan a chep tawh em mai a a hran din a ngai a ni,” kan tih hun lo thleng ta se, thil a khirh ṭalh ṭalh tawh hle ang. Chutih hunah chuan, Hospital building sakna tur ram ruak, zau ṭha si hmuh tur a vâng tawh viau maithei.
Damdawi in building chu sak theih mah se, a ken tel tur building sakna a awm lo tih te chu harsatna awm turah ka ngai lo. Damdawi in building a awm chuan sawrkar tan pawh a ken tel tur sakna tur ngaihtuah hi thil har a nih a rinawm loh; Central sum sawi chhuahna atana hman pawh a nuam zawk hial ang. Tin, World Bank sum hmangin damdawi in thawmṭhatna tur leh quality tih chakna tur hi thla 3 danah cheng nuai 10 zel, kum 5 chhungin kan hmu dawn a; he project hi kalpui tan mek a ni bawk. Hemi hmang hian thil tam tak kan siam belh theiin a rinawm a, damdawi in sawn kan tum hun hi a fuh chiah niin a lang.
Tuna damdawi in hmun thar turah hian Helipad pawh a siam tel theih tih te sawi a ni a, hei hi hmunpui zawka dam lo refer ngaite leh hmun dang atanga Serchhip damdawi ina panpui hmanhmawh ngaite tan a ṭangkai khawpin a rinawm. A hmunhma a zau ṭha a nih phei chuan, dam lote tana zing leh tlai kara hawi thawvenna tur hmun park a siam tel theihte phei chuan duhthusam a ni lehzual.
Tun ang hian doctor indaih loh leh hmanraw neih ṭhat loh bik hi kan nei reng kher lo turahte pawh ngai ila; specialist doctor chikim kan neih theih a, khawl changkang leh ṭha leh a hmangtu tur mi thiam kan neih tel vek hunah phei chuan, ram laili, Zoram chhim leh hmar aṭanga panna hla lova awm, hmunhma ṭha si hian kan khaw tan malsawmna lian tak a la thlen ngeiin ka ring.
Tin, a hmunhmain a zawh chuan kawng hrang hrangah tih changtlun leh tih len belh zel dawn pawhin chance kan nei ṭha dawn a, state sawrkar leh sawrkar laipuiin mipui hriselna kawnga hma lakna tur scheme a siam thar rengna kawngah hian a dawnthleng lo neih ṭhat hi a dawnthleng zim ai chuan a ṭha zawk hrim hrim tura ngaih a ni.
Damdawi in hmun hma tharah, ruahmanna felfai tak nena bul ṭanin inrem chho ila, kan chhehvel mai ni lo, ram pawn aṭanga an rawn pan chak khawpa damdawi in nuam leh hahdamthlak neih tumin mipuite hian ngaihtuahna i sêng teh ang u.