Nizan hmasa khan Central YMA bultumin Mizoram hmun hrang hrangah a a rualin hnamdang ILP neilo leh ILP diklo te dap runpui neih a ni a, hman deuhah pawh Central YMA hian Aizawl-ah ILP leh hnamdang Trade Licence nei lo te an lo dap tawh a, mahse hetianga hnamdangte Trade Licence leh ILP te dap sak tura thuneihna hi YMA-in an neih loh avangin khami ṭum khan Aizawl DC chuan khapna thupek a chhuah a, amaherawhchu Police te nen ṭangtlangin YMA hian a khat tawkin an dap fo tho a, YMA leh Police te ṭha taka an thawk tlang ṭhin hi thil lawmawm tak a ni.
ILP neilo leh ILP diklo hmanga Mizorama rawn lut dap an nih hian mi engemawzat man tur hi an awm reng a, Serchhip-ah pawh a khât tawkin Police-ten ILP hi an endik zeuh zeuh ṭhin a, an endik apiangin man an nei deuh zel bawk.
Amaherawhchu ILP neilo leh diklo hmanga Mizorama hnathawkte dap kawngah hian hmalakna hi duhthusamin kan nei ngun lo niin a lang. Tun aia zing hian hemi kawnga mawhphurtute hian hma la thei se a duhawm hle. A thawktu tur lamin hma an la chaklo a nih chuan Mizo hnam leh Mizoram tana hmalatu tlawmngai pawl te hian thawktute kan nawr deuh te pawh a ṭul ṭhin niin a lang.