Sa talh tur endik hmasak ni ve se

Tunhnaiah Mizoramah Vawk natna hri a lêng tih hriat a ni a, Mizorama hri leng aia hlauhawm hi Myanmar-ah a leng tih hriat a ni bawk a, hei vang hian tunkar chho hian Myanmar aṭanga vawk lakluh khapna thupek pawh District Bawrhsap-ten an chhuah rin a ni.

Vawk hri leng laka mipuite an him theih nan Aizawl-ah chuan vawk talh zuar/ser turte chuan Local Council/Village Council leh Vety hriatpuina an neiin, a hrisel ngei a ni tih certificate an nei ngei tur a ni, tiin thupek siam a nih bakah he hri vanga vawk thi te pawh LC/VC hriatpui-naa phum tur a ni tiin thupek siam a ni tawh bawk.

Serchhip chu he Vawk hri hian min la tibuai ve lo nia hriat nimahse Serchhip pawh he hri hian thleng ve thei dinhmunah a ding mek a, chuvangin  Mizoramah Vawk hri lêng a awm tih hriat a nih chhung tal chu Serchhip mipuite himna atan vawk talh tur te hi an hrisel leh hrisel loh endik hmasak ve ni thei se a duhawm khawp mai, Serchhip-ah chuan nitin sa zawrhna hmun pakhat chauh kan nei a, sa talh tur endik zel hi thil harsa niin a lang lova, Sa zuar te tan pawh an sa talh a hrisel tih hriatpuina nena sa zawrh a nawm zawk a rinawm.