Lirthei tlan chak sawisel ai chuan mahni lam invên

Hunrei tak kan khawpui chhung kawngpui siamṭhat loha a awm hnu-ah tunah chuan kan kawngpui chu siamṭhat a ni ta a, a lawmawm hle a, kawngpui a ṭhat tak avang hian tunhmaa muang te te-a tlân ṭhin lirthei te pawh tunah chuan tun hma aia chakin an tlân a, hei hi mi tam takin sawisel ṭhin mahse kawngpui ṭha-in a ken tel a ni tlat si a, nasa tak takin sawisel ṭhin mahila a sâwt dawn chuang lo niin a lang.

Khawvel ram dang khawpui lian tak takah pawh kawngpui ṭhaah chuan kawng kân harsa khawpa chakin lirthei an tlan fua fua a, mipuiin sawisel lovin anmahni lam an invêng mai a. Hetiang bawk hian keini pawhin kawngpui ṭha kan neih ve takah chuan chak tak taka lirthei tlan hi a nih dan tur anga ngaih mai hi kan tihtur niin a lang ta a, mipui lam hian lirthei tlan chak laka kan himna tura kan fimkhur mai a ngai niin a lang ta.

Hetihlai hian khawi khawpui-ah mah khaw chhunga intlansiak hi phal a ni lova, chuvangin kan khawpui chhunga intlansiak te erawh dimna nei lova hrem ngei ṭhin nise a ṭha khawp ang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram