Meizukna hmun hran siam nise

Inrinni zing khan Serchhip District Anti Tobacco squad te chuan Bazar, Taxi stand leh dawrah te meizu check-in mi 21 an man a, pawisa chawitir nghal an ni.

Meizuk hi hriselna atan a ṭhat loh avangin sawrkar chuan mipui punkhawmna hmun hrang hrang leh sawrkar Office leh hmun pawimawhah te Meizuk a khap a, heng hmunah te hian Mei zuk khapna thu te pawh tar a ni vek tawh chungin Anti-Tobacco Squad-ten phallohna hmuna meizu an dap apiangin man tawk chu an la nei zel tho mai.

Hetihlai hian tun hma ai chuan nasa takin puipunna hmuna Meizu hmuh tur an tlem tawh a, tunhmaa Khawhar in-a mei zuk khu zam chuai chuai ṭhin te kha hmuh tur a awm tawh mang lova, chutiang bawkin sawrkar phallohna hmun hrang hrangah te pawh hian meizu hmuh tur an awm mang tawhlo a ni.

Meizuk ṭhatlohzia zirtirna a nasa hle chungin Meizuk sim hlei theilo hi engemawzat an la awm a, heng mite hi an chêp hle tawh a, Bazar, Puipunna hmun hrang hrang leh sawrkar Office zawng zawngah mei zuk phal a nih tawhlo a, mahse meizuk an chakna a chhuah tawh chuan an insum hlei thei tawh ṭhin si lova, chuvangin an remchanna hmun hmunah an chakna tireh tura a ruka meizuk-na tur hmun an zawn a ṭul a, an vanduai ṭum phei chuan man an tawk a, pawisa chawitir an ni leh ṭhin a, sawrkar phalloh thil ti ni mahse an dinhmun ngaihtuah chian chuan an khawngaihthlak hle.

Sawrkar-in hmun hrang hranga meizuk a khap hi meizu ve lo tan a thawventhlakin, thil ṭha tak a ni a, amaherawhchu, meizuk khapna hmun hrang hrangah meizuk khap a nih thu tar a nih rualin meizuk theihna hmun bik siam a ni ṭhin si lo hi meizu mite zalenna rahbehsakna ang hialah a ngaih theih awm e. Chuvangin, meizuk khapna hmun apiangah hian meizuk theihna hmun bik hi siam nise, chutiang a nih chuan meizu mite pawhin meizu lo te tana hnawksak lo turin mei an zu thei tawh ang a, an duh ti thei turin zalenna hmun an nei ve thei dawn a ni. Meizuk khapna hmun siamnaa Meizuk theihna tur hmun bik siam hi angkhata khua leh tui te enkawlna tur niin a lang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram