Nimin khan Serchhip-ah Fire Prevention Week (Kangmei ven hapta) hawn a ni a, Serchhip-a hapta hawn a nih rual hian Thenzawl-ah leh N.Vanlaiphai-ah te pawh hawn a ni a, District chhung khaw hrang hrang-ah Awareness Campaign la neih chhunzawm zel tum a ni bawk a ni.
Kumtinin tun ang hun chho hi kangmei chhuah duh hun a ni a, ram lamah phei chuan lo hal hun a nih chhoh avangin ram kang pawh a tam hunlai tak a ni a, chuvangin tun ang hun hi kangmei laka fimkhur hun tak a ni.
Kan rama Kangmei chhuak thin hi mihring kuthnu vanga chhuak a ni deuh vek a, chuvangin kangmei tichhuak lo tura kan fimkhur vek chuan tun anga kangmei vanga harsatna kan tawh leh kan buai ang em em hi chuan kangmei hian harsatna min thlen leh buaina min siam nasat a rinawm loh a ni.
Chuvangin, kangmei tichhuak lo tura mitinte kan fimkhur a ngai a, ram kan tihkanna chhan bul ber lo / huan halah hian kan fimkhur zual a ngai a, vanduai vang chu awm mahse lo / huan halna atanga kangmei chhuah chhan hi chu meikawng sah that /zauh tawk loh vang a ni tlangpui a, chuvangin, lo / huan hal turten mei kawng zau tha takin sat ila, tin, ram vak leh lui kal ṭhenkhat fimkhur loh vang aṭangten ram kang a awm duh a, kan meichhem kan kalsan dawnin chiang takin tihlum hmasa phawt ṭhin ila, tin, meizu mite pawhin kan meizial zuk bung te kan paih hma-in tihlum hmasa phawt ṭhin bawk ila, puitling te kan fimkhur mai piah lamah naupang te pawhin kangmei an tichhuak thei tho a, naupang tihchhuah a nih avangin pawi a khawih nep bik si lova, chuvangin naupangte hi kangmei tichhuak thei tur thil kan kentir loh pawh a ṭul hle bawk.