Khua a ṭhal chho leh ta a, Kawlphetha siamchhuahna tuihna te a tlem avangin Kawlphetha duhkhawp hman tur kan nei lo chho leh ṭan a, hetihlai hian tunhnaiah Serchhip khawpui chhunga Power Supply pek dan a mumal lo hle a, reilote a thim a, reilo-ah (a chang chuan minute 1 pawh tling mang lovah) a rawn êng leh a, reilote-ah a thim leh a, hetiang hian zan khatah pawh ṭum 6/7 vel lai a awm ṭhin a, hetianga Power Supply pek chhuah dan mumal loh chhan hi mipuiin kan hre lova, eng harsatna vanga hetianga awm hi nge tih hriatpui lotu mipui an thinrim ṭhin hle a ni.
Hetianga Power Supply mumal lo taka pek a ni ṭhin hi Department lamin harsatna an tawk a nih ngei a rinawm a, an duhdan a nih a rinawm bik loh. Hetihlai hian hetianga Power Supply mumal lo taka an pek chhuah chhan mipui lamah hriattirna engmah an tichhuak lo hi mipui rawngbawltu te tih atan chuan thil inhmeh lo tak a ni a, Power Supply pek chhuah dan mumal loh chhan hi Department lam hian an rawng an bawlsak mipuite hnenah hian an hriattir a hun tawh hle a, thlatin electric hman man petu mipuite hian hetianga kawlphetha mumal lo taka an hmuh chhan hriat ve hi an phu a ni.