Tunhma aṭanga Mizoten intihhlimna hun atana kan hman ṭhin, Mizo te Kût ropui bera ngaih leh tun thlenga Mizoten kan la hman chhunzawm zel, Chapchar Kut chu vawiin hian Mizoram pumah hman a ni dawn a ni.
Chapchar Kut hi kan hnam lâm leh zai te, kan hnam nunphung leh chin dan hrang hrang, kan hnam thawnthu leh kan hnam incheina te kan pholanna hun ropui ber a ni a, Chapchar Kût kan hman ṭhin avang hian ṭhangtharten kan Mizo hnam lâm leh zai te an thiam phah a, kan Mizo incheina leh hmasang Mizo nunphung leh chindan hrang hrang te an hriat phah a, chuvangin Chapchar Kut hi kan Mizo hnam rohlu te kan chhawm nunna kawnga thil pawimawh tak a nih avangin, Mizo mipuite hian kan culture kan vawnhimna atan Chapchar Kut ngaih pawimawh hi kan tihtur a ni tih kan hriat thar a ṭul hle.
Nu leh pa te pawhin Chapchar Kut avanga kan faten hnam lâm emaw, zai emaw pakhat an thiam belh pawh Mizo hnam tan a hlu tih kan hriat a pawimawh a, rual û zawkte hun a liam ang a, tuna kan fa, naupang tê tê te kutah hian kan hnam rohlu te vawn-him leh vawn nunna mawhphurhna a innghat dawn tih kan hriat a ṭul a, kan faten kan hnam lâm leh zai te, kan hnam incheina leh kan hnam nunphung te an hriat loh chuan kan hnam rohlu te hi engtikawng mahin an vawng nung thei dawn lo. Chapchar Kut hi ṭhangthar te hnena kan hnam rohlu te kan hlan chhâwn theihna hun a ni tih hria-in, Chapchar Kut hlut nachang kan hriat hi thil ṭul tak a ni.