Hrui hnawk chinfel dan zawng ve thei ila

Aizawl Beautification Committee chuan Aizawl khawpui chhunga Telephone leh Cable Television Providers te hrui thlun hnawk deuhva hriatte felfai zawka thlun dan tur an ngaihtuah a, kawngpui dunga hrui hnawk te chinfel an tum a ni.
Kawngpui dunga hrui inzam hnawk hi a mawi loh mai piahlamah hrui zam ṭhat loh tam tak hian lirthei sâng deuh te chêt velnaah te harsatna a thlen fo a, lirtheiin a tai chah ṭhenkhat a awm avanga tuten emaw harsatna an tawh phah te a awm ṭhin a, tin,  in sa thar tur te tana harsatna thlen thei te a nih bakah kawng tam takah a bul vela mite tan harsatna a thlen fo ṭhin a ni.
Aizawlah mai ni lo, khawpui dangah pawh hian hetianga hrui inzam hnawk leh hrui zam ṭhat mumal loh hi a nasa sâwt hle a, Serchhip-ah ngei pawh hian kan kawngpui dung hmun lun deuh laiah hian hrui inzam hnawk a nasa ve tawh hle a, amaherawhchu, Aizawl ai chuan nasat chu a la nasa lo deuh a, Aizawl ai chuan harsatna pawh min la thlen lo deuh ni chuan a lang a, amaherawhchu, tun ang renga kan kal chho zel te a nih chuan nakin lawkah harsatna min la thlen ve ngei dawn a ni.
Chuvangin, tuna, hrui zam hnawk la tam loh lai leh chinfel la awlsam deuh lai hian kan kawngpui dunga hrui inzam hnawk leh hrui zam kal dan mumal lo lutuk te hi chinfel ve dan ngaihtuah a ṭha khawp mai a, hemi kawngah hian thuneitu lam hian hma la se, kan hrui zam hnawk te chinfel a nih rualin, tun hnu-a hrui zam thar turte tan pawha an hrui zam dan tur mumal taka duansak nghal pawh a ṭha khawp mai.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram