Nimin khan Serchhip Chuanhnuai rama Bawng/ran chaw chinna hmun, kumtin ṭhal laia kang ziah chu kuminah chuan helai hmun kâng tur vênna atan hnatlangin mei kawng sial a ni a, meikawng siala hnatlang te hi an fakawm hle a ni.
Hetianga kumtina kângmei chhuahna ṭhin ram te a kan lohna atana vênna tura meikawng sial a ni hi thil ṭha tak a ni a, Kangmei a chhuah hnu-ah ram kâng ṭhelh tura hmanhmawh taka tha thawha ṭhelh vak ngai ṭhin tho a ni a, chu ai chuan a kan hmaa muangchang deuh zawk pawha a ven hna thawka tha lo thawh lawk mai hi thil finthlak tak pawh niin a lang.
Helai hmun chauh ni lo, Serchhip hmun dangah pawh kumtin deuhthawa ram kanna hmun dang a awm nual a, tin, kângmei chhuah duhna tur leh ram kâng palh se hlauhawm tak ni thei tur leh thil hlu tak tak kan chhiat theihna hmun te a awm a, heng hmun dang te pawh hi lo vên lâwk dan kawng zawn pawh hi a finthlak hle-in a rinawm.
Tlawmngai pawl emaw, VC emaw-in hnatlanga an huamchhunga an thawk thei a nih chuan a ṭha viau ang a, chutiang a harsa deuh a nih pawhin MGNREGA hnuaia inhlawhna hmang hian meikawng sial dan te hi zawn theih nise a ṭha khawp ang.