Vantlang Zun in te hi

‘Faina hi changkanna a ni’ an ti ṭhin a, a dik a, kan khawpui pawh a changkang chho telh telh a, a fai ve telh telh a, tunhma lam ngaihtuah chuan kan khawpui pawh a fai ve ta khawp mai. Hetihlai hian tunhma aṭanga hmun ṭawp leh tenawm tak ni fo, kan Vantlang Zun In te erawh chu tunah pawh a la ṭawpin, a la tenawm em em reng tho mai a, hemi kawngah hian ṭan kan lak lehzual a la ṭul khawp mai.
Tun hma chuan Vantlang Zun In-ah ‘Hetah hian E Suh’ tihte tar a ni fo a, tunah chuan hetiang thuziak tar hi hmuh tur chu awm tawh chiah lo mahse kan khawpui chhunga vantlang zun in tam zawk te hi a la ṭawpin, a la tenawm em em a, enkawltu mumal an nei lo tih a chiang hle a, a khaw neitute tan a la chhuanawm loh hle hlawm a ni.

Kan Vantlang zunin ṭhenkhat ṭawp nachhan hi chu a tir aṭanga a siam fuh loh vang leh ruahmanna ṭha tak awm lem lova sak tih a chiang hle a, zun luanralna tur ṭha siam awm lem lo te a awm a. Tin, zun hing tihralna tur tui ruahman sa awmlo te a ni bawk. Hengte avang hian kan zun in tam zawk hi a ṭawp niin a lang a, tin, zun in ṭha taka siam pawh enkawl leh tinfai ṭhin a nih loh chuan hun engemawchen hnu-ah chuan a ṭawp lo thei lo bawk a ni.

Chuvangin, zun in kan siam/sak dawn hian kan zun te awlsam taka a luanral zung zung theihna turin ruahmanna ṭha tak neisa-in siam ila, tin, kan zun hing leh rimchhe tak takte tleuhfaina tur atan Zunin chungah emaw, hmun remchangah tui dahkhawlna tur pawh hi siam tel theih ni bawk se thil ṭha tak chu a nih a rinawm. Tin, Zun in siamtu ten a enkawl zuina lam an ruahman tel theilo a nih chuan a awmna hmun neitu VC emaw, YMA lamin enkawlzui hna thawk thei se.Hetianga kan vantlang Zun in te kan kalpui thei a nih ngat chuan kan khawpui hian faina lamah nasa takin hma kan sawn phah ngei a rinawm.

Tuna kan vantlang zun in tam zawk hi chu zun in thianghlim ni tur chuan ṭhiah vek a, a bul aṭanga sak ṭhat leh ngai an ni hlawm niin a lang a, Swachh Bharat Mission kan kalpui mekah hian vantlang zun in lam pawh hi kan hma tel a ṭul hle niin a lang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram