Naupang pawhin kângmei an tichhuak thei

Fire Prevention Week (Kangmei ven hapta) chu hman chhoh mek a ni a, kangmei tichhuak lo tura fimkhur a ṭulna te pawh inzirtir chhoh zel a ni a, tun dinhmunah kângmei chhuak nasa lutuk a la awm lo niin a hriat a, a lawmawm hle a, mitinte kângmei tichhuak lo tura kan fimkhur ṭheuh zel a nih chuan kângmei hian harsatna min thlen nasat loh ngei a beiseiawm tlat a ni.
Kan rama Kangmei chhuak ṭhin hi mihring kuthnu vanga chhuak a ni deuh vek a, mihring kuthnu vanga kangmei chhuak tam zawk hi fimkhur tawk loh vang a ni bawk a, chuvangin kangmei tichhuak lo tura kan fimkhur vek chuan kum danga kangmei vanga harsatna kan tawh leh kan buai ang em em khan kangmei hian harsatna min thlen leh buaina min siam nasat a rinawm loh a, kângmei chhuak vanga kan huan thlai leh thing leh mau, kan thil hlu hrang hrang kâng ral ṭhin te pawh a him thei ngei ang.

Chuvangin, kangmei tichhuak lo tura mitinte kan fimkhur a ngai a, ram kan tihkanna chhan bul ber lo / huan halah hian kan fimkhur zual a ngai a, vanduai vang chu awm mahse lo / huan halna aṭanga kangmei chhuah chhan hi chu meikawng sah ṭhat /zauh tawk loh vang a ni tlangpui a, chuvangin, lo / huan hal turten mei kawng zau tha takin sat ila, tin, ram vak leh lui kal ṭhenkhat fimkhur loh vang aṭangten ram kang a awm duh a, kan meichhem kan kalsan dawnin chiang takin tihlum hmasa phawt ṭhin ila, tin, meizu mite pawhin kan meizial zuk bung te kan paih hma-in tihlum hmasa phawt ṭhin bawk ila.

Puitling te kan fimkhur mai piah lamah naupang te pawhin kangmei an tichhuak thei tho a, kângmei a chhuak tawh a nih chuan naupang tihchhuah pawh nise puitlingin kângmei a tihchhuah aiin pawi a khawih nep bik si lova, chuvangin naupangte hi kangmei tichhuak thei tur thil kan kentir loh pawh a ṭul hle a, naupang te hi kan fimkhurpui an ṭul hle bawk a ni.