Supply Godown hmun hi sawn dan zawn nise

Serchhip-a Food, Civil Supplies & Consumer Affairs Godown awmna hi a laili hle a, mi ṭhenkhat tan a awlsam viau rualin mipui tam tak tan chuan hnawksak a ni ṭan ta niin a lang a, a hmun hi sawn dan kawng zawn a ṭul chho tawh niin a lang.
Supply Godown-a buhfai dahlut leh phur chhuak turin motor lian hman a ni ṭhin a, buhfai dahluh vanglai leh phurh chhuah vanglai tak chuan Godown-a buhfai dahlut tur leh phur chhuak turin a chhehvel kawng dung-ah lirthei lian an ding ṭhup ṭhin a, kan kawngpui te a lian lova, kawngsira lirthei lian an din chuan kan kawngpui hi a tê kâwk mai ṭhin a, a hmaa awlsam taka lirthei inpêl thei ṭhin kha chep taka an inpelh a ngai ta ṭhin a, hei hian lirthei chetsualna a thlen palh mai pawh a hlauhawm ṭhin a ni.

Hei bakah hian Supply Godown awmna hi khawpui chhung a nih avangin a chhehvela lirthei lian tak tak ding ṭhin hian mipui tan pawh kawng kân a tihlauhawmin, chetsualna hial pawh a thlen a hlauhawm ṭhin hle a, naupang, fimkhur nachang hrelo phei chu kawng an kân dawnin kawngsira lirthei ding kâr aṭangin chak tak takin an tlan chhuak fo a, kawngpuia lirthei lo tlan lai a lo awm palh chângin a hlauhawm ṭhin hle a ni.

Chuvangin, tuna kan dinhmun thlir hi chuan lirthei chetsual palh thleng thei lakah leh mipui himna atan Supply Godown hi khawpui laili aṭanga sawn chhuah hi thil ṭul tak niin a lang ta a ni.

Chhiahtlang dai-ah khan Supply Godown tur pawh hi ruahmanna a awm tawh te pawh niin a lang a, Buhfai dahluh leh phurh chhuah chu lirthei hmanga tih vek a nih tho avangin khaw chhung ni lovah pawh awm mahse buaina lutuk a thlen a rinawm loh a, chuvangin Supply Godown sawn chhuah dan kawng hi thuneitu lam hian zawng thei se thil duhawm tak a ni. Chhiahtlang daia Godown tura ruahman sa pawh hi luah hma-ina  chhe mai ang tih pawh thil hlauhawm tak a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram