Thupek chhuah zawm ṭhat leh bawhzui ṭhat

Tunhnaiah Mizoram hmun ṭhenkhatah silai ṭha tak tak hmangin sava tam tham tak tak kahthlak ṭhin nia sawi awm chuan nghawng a nei chho mek a, Environment & Forest Department lamin hemi chungchanga hma an lak mai bakah DIG (Nothern Range) pawhin a hnuaia SP hrang hrangte hnenah hemi chungchanga hma la tur hian a hriattir a, District Bawrhsap ṭhenkhat te pawhin an huam chhungah Sava man leh thah khapna thupek an chhuah a, Serchhip District Bawrhsap pawhin hemi chungchangah hian thupek a chhuah tawh a ni.
Sawrkarin thupek an chhuah hi a mipuite ṭhatna tura a chhuah ṭhin a ni a, mipuite hian thupek kan zawm ṭhat leh keimahnin kan hmakhua kan tiṭha tihna a ni a, kan zâwm ṭhalo a nih chuan keimahni mai bakah midangte hmakhua atan harsatna kan thlen ṭhin tih hria a, sawrkarin a mipuite ṭhatna tur ngaihtuah chunga thupek a chhuah te hi ṭha taka kan zawm ṭhin a ṭul a, sawrkarin a khua leh tui te tan hamṭhatna tur chanvo chi hrang hrang min siamsak ang hian sawrkar thupek ṭha taka zawm hi khua leh tui ten sawrkar laka kan tih ve tur leh kan bat a ni tih hi kan hriat thar leh pawh a ṭul hle a ni.

Hetihlai hian sawrkar thupek hrang hrang te zawm ṭhat a nih tawk loh ṭhin chhan ni theia lang chu sawrkarin thupek a chhuah te hi a bawhzuitu tur ten an bawhzui ṭhat tawk loh vang niin a lang a, sawrkarin thupek a chhuah a, thupek zawm lo an awm ngei tih hriat a nih hnuah pawh thupek zawm lo te chunga action lâk a ni lo ṭhin te, mipui lamin thupek an zâwm ṭha tawk em tia enfiahtu leh thlithlaitu an awm loh ṭhin vang te hian sawrkar thupek tam tak hian ngaihpawimawh leh zawm a hlawh ṭhat tawk loh phah ṭhin ni te pawhin a lang. Chuvangin, sawrkar thupek chhuah te hi a chhuahtu lam leh thupek bawhzuitu tur lam te pawh hian thupek a hlawhtlin theihna turin ṭha taka bawhzui te pawh hi a ṭul niin a lang bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram