Zothlifim Logo
Loading ...

Central sawrkar chuan India ram hi ram fai ni turin hma a la mek a, chumi tur chuan Swachh Bharat Mission a kalpui mek a, he mission-in a ngaih pawimawh ber pakhat, India ram chu khawlaia inthiar/daikal awm lohna, Open Defecation Free (ODF) ni turin chak takin hma lak chhoh a ni a, Serchhip District chhunga khua te chu ODF-ah an inpuang vek ta a, hemi endik hna hi nimin khan District Level Team chuan an thawk a, District Level-a endik hnu hian State Level-a endik leh a ni dawn a ni.

Sawrkarin faina kawnga hmalak a ngaih pawimawh angin sawrkar lam leh tlawmngai pawl te pawhin hemi kawngah hian nasa taka hma la-in inzirtirna te pawh neih ṭhin a ni a, hei hian rah ṭha chhuahin Mizoram pawhin faina kawngah hma a sawn nasa hle a, hei hian nghawng ṭha tak a nei chho mek niin a lang a, thil lawmawm tak a ni.

Faina hian hriselna a keng tel a, faina kawnga nasa taka hma lâkna avang hian tun hmaa natna tam tak leh hri leng ṭhin tam tak lakah pawh mipuite kan fihlim chho mek a, faina kawnga hmalakna hian kawṭhalo, santen, malaria leh natna dangte pawh nasa takin a titlem a ni.

Hetiang hian faina kawnga kan hmalakna hian hmuh theihin rah ṭha a chhuah a, he hmalakna chhawrtu chu mipuite kan ni a, tuna kan thlen chinah hian lawmawm viau mahse duhthusam erawh a la ni chuang lo tih kan hriat tlan a ṭul awm e.

Faina-in thil ṭha tam tak min thlen avang hian faina kawnga hma kan lakna hi a thlawn lo tih a chiang a, chuvangin mipuite hian faina kawnga hma kan lak nasat leh kan tan a ṭha zel dawn tih hriain, sawrkar leh tlawmngai pawl ten faina kawnga hma lakna tur an duan te bawhzui kawngah nasa lehzuala tha kan thawh chhoh zel a ṭul takzet a ni.