Serchhip-a Internet Service chhe lutuk hi

Tunlaiin Serchhip-ah Internet Service a chhe hle a, hei hian mi tam tak a nghawng a, mi tam takin harsatna an tawh phah mek a ni.

Sawrkar laipuiin hma a lakna leh ruahmanna hrang hrang a kalpui mekah Internet hmanna tur a tam ta hle a, hetihrual hian Serchhip-ah ngei pawh sawrkar hna thawhna atan mai bakah mimal tam takten ṭangkai takin internet an hmang nasa sawt hle a, eizawnna innghahna atana hmang pawh an awm ta nual mai.

Hetihlai hian Serchhipah hian Internet Service a chhe thei hle a, a bikin tun hnaiah a chhe zual em em a, BSNL-in Broadband service an pek chhuah hian an subscriber te lungawina a thleng zawh lohna a rei ta hle a, BSNL lam hian service ṭha tak pe thuai turin insawi ṭhin mahse hmasawnna hi tun thlengin hmuh tur a la awm chuang lo a ni.

Hetihlai hian tun hnaiah a chhe zual a, tunlai tak phei hi chuan BSNL mai bakah Telecom company dangten internet an pek chhuah pawh Serchhip Bazar velah chuan hman hleih theih loh châng a tam hle a, mi tam takin sum sêngin internet pack an lei a, mahse an hmang ṭha leh thei si lova, hman lohin sum tam tak an paih fo a ni.

Serchhip mipuiten kan tlukpui nia kan ngaihte kan ûm phâk ve zel theihna atan leh hma kan sâwnna kawng atan tunlai khawvelah chuan Internet-ah kawng tam takin a innghat tawh a, Internet Service chhia-in a tihbuai loh khawp hian kan khua hi kan hnufual bik lo tih kan lantir a ṭul a, mahni tualzala inphun lungawi mai mai lovin, Serchhip mipuiten internet service ṭha leh changtlung zawk kan neih theih nan sawrkar thuneitute mai bakah tlawmngai pawl, Consumer Union lam pawh hian hma la thei se a duhawm khawp mai.

Leave a Reply

This site uses Akismet to reduce spam. Learn how your comment data is processed.