Vawk hri lêng laka kan fihlim nan hma lak a ṭul

Tunlaiin Champhai leh a chhehvelah vawk pul hri a leng mek a, he vawk pul hri vang hian vawk 40 chuang a thi tawh a, vawl pul hri hi eng natna ber nge tih finfiah turin a Sample endik tura thawn mek a ni.

Mizo te hi vawk vulh kan uar a, chhungkaw pakhatin vulh tam lo mahila vawk vulhtu chhungkua erawh kan ṭhahnem hle a, kan in bulah kan vulh tlangpui a, hei vang hian kan vawk in pawh a inhnaih a, hetianga a pul hri a len hi chuan an inkai chhawng chak hle a, chuvangin, khawtin te hi vawk pul hri laka fimkhur hi thil ṭul tak a ni.

Nikum lamah pawh nasa takin vawk pul hri hi a leng tawh a, Champhai lamin an tuar nasa a, hei hi darhin Serchhip-ah ngei pawh chhungkaw tam takin an vawk vulh lai an lo chân tawh a ni.

Hetiang a nih avang hian Serchhip District pawh vawk pul hri laka kan fihlim theihna atan tun aṭanga nasa zawka ṭan kan lak nghal a ngai a, sawrkar thuneitute pawhin hemi kawngah hian hma an la thuai turah ngai ila, sawrkar aṭanga hmalakna hi awm hma viau ṭhin mahse mipui lam hian sawrkar thupek hi kan zawm ṭha tawk lo fo ṭhin a, sawrkar thupek te zawm ṭha tura mipui hmin kawngah hian sawrkar aiin tlawmngai pawl (YMA etc.) hmalakna hian chak zawk chang a nei fo a, chuvangin, he vawk pul hri laka kan himna tur hian sawrkarin hma a lak bakah tlawmngai pawl te pawh hian rang zawkin hma la thei se a duhawm khawp mai.

Ran hri lêng hi kan ran vulhten an tawrh bakah mihring hriselna thleng khawih thei thil a nih avangin mipuite pawh hemi kawngah hian kan fimkhur a ṭul takzet zet a, sawrkarin hmalakna nei lo mahse hetiang hrileng tuar nasa ber ṭhin mipuite hian kan theihna chin chinah hri leng laka kan fihlim theihna tura ṭan kan lâk hi a ṭul hle bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram