Kar kalta khan SEDP hnuaiah Serchhip District-a MJA member-te chuan project site visit neiin, PMGSY sum hmanga Serchhip District chhunga kawngpui siam ṭhenkhat an tlawh a, he hunah hian sawrkar lam aṭanga kawng siam enkawltu, PWD hnathawktuten an hmalaknate an lo hrilh bakah kawngpui siamin a pawh khaw mipuiten kawngpui siam chungchanga an harsatna leh an mamawhte an lo hrilh bawk a ni.
PMGSY hmanga kawngpui siamsak thingtlang khaw engemawzat tan chuan PMGSY a awm hi vanneihna a ni a, fur leh ṭhal-a an mamawh chakkhai lamna kawngpui zawh harsa tak takte PMGSY sym hmanga kawng nuam tak siamsak an ni hi an vannei a, kawng tam takah an khawsak a tiawlsam a, an khuate tan pawh hmasawnna nasa tak a thlen phah tih a chiang hle a ni.
Hetihlai hian PMGSY hmanga kawngpui siam chungchangah hian harsatna neuh neuh a awm niin a lang a, PMGSY hnuaia kawngpui siamte hi a a siamtu contractor-te hian an kawngpui siam hi an siam zawh aṭanga kum 5 chhung enkawl zui hna hi an thawk tur a ni a, chumi enkawl zuina tur sum pawh dah a ni. Hetihlai hian contract hna dang ang bawkin, PMGSY hmanga kawngpui siamah pawh hian kawng siamtu ṭhenkhat hian anmahni hming ni lovin, Register contractor dang hming hawhin kawng siam hna hi an thawk fo a, hei hian kawngpui siam zawh hnua a enkawl zui thleng pawhin nghawng a nei niin a lang. Anmahni hming ni lova kawng siamtu contractor ṭhenkhatin kawngpui an siam zawhte enkawl zui hna an thawk ṭha tawk lova, a chhia an thawm ṭha mai lo ṭhin chu khaw tam takin an tuar niin a lang a, hetianga contractor-ten an kawng siam an enkawl zui ṭhat loh avang hian contractor-te chungah hmalak ni dawn se, a hnaa a hming putute hi a hnathawktu tak an nih loh avangin sawrkar lam aṭang pawhin hma lak tak tak a har fo niin a lang a, hetiang bawk hian hna dangte pawh hi a nih ngei a rinawm a, hemi chungchanga harsatna thleng ṭhin hi a thlen tawh loh nan sawrkar hian a ven dan leh chinfel dan zawng se a ṭha khawp mai.