Editorial: Dân bawhchhiaa phal loh thil laluttute kan vil tlân a tul

Tunhnaiah India ram state ṭhenkhatah arva pul hri (Bird Flu) a leng a, hemi hma deuh aṭanga tun thleng hian kan state ṭhenawm hnaiah vawk pul hri hlauhawm tak African Swine Fever (ASF) a lêng bawk a, Bird Flu hi chu kan state tan a la hlauhawm pha lova hriat a nih avangin ar lakluh khapna thupek hi sawrkarin a la tichhuak lo niin hriat a ni. Hetihlai hian vawk pul hri (ASF) erawh chu kan state tan pawh a hlauhawma hriat a nih avangin vawk leh vawksa aṭanga thil siam reng reng lakluh khapna thupek sawrkarin a tichhuak tawh a, tun thlengin Mizoramah ASF hi a lo la thleng lo niin hriat a ni.

Hman kum khan vawk pul hri chi khat, Porcine Reproductive & Respiratory Syndrome (PRRS) chuan Mizoram a tuam a, Mizorama vawkte nasa takin a suat a, vawk vulhtu tam takin an tuar hle a. Chu mai bakah khaw tam takin thla tam tak chhung vawk sa ei tur pawh an neih theih loh phah hial a nih kha.

Hetianga ran hri a lên hian sawrkar thuneituten ngun takin hri len dan dinhmun an thlir a, Mizoramin harsatna a tawh lohna turin hma an la ṭhin a ni. Tunah pawh arva pul hri (Bird Flu) chu Mizoram tan a la hlauhawm lova an hriat avangin, Mizoramin ar leh artuia harsatna kan tawh lohna turin ar lakluh khapna pawh an la tichhuak lo niin a lang a. Vawk pul hri (ASF) erawh chu Mizoram tan a hlauhawm phaa an hriat avangin ram dang aṭanga vawk leh vawksa aṭanga thilsiam lakluh khapna an tihchhuak tawh a, tun thlengin he vawk pul hri hi a lo la lut lo niin a hriat a, a lawmawm hle a ni.

Hetiang karah hian tute emaw, a nghawng pawizia chhût phâk lo leh, duhâm zualten dân bawhchhiain a rûka thil ti an lo an awm chang a thleng leh zauh ṭhin a, hengho thil tih rah hi ram mipuiin kan tawrh phah fo ṭhin a ni. Chuvangin, hetianga a rûka dân bawhchhiate hi dân leh thupek kengkawhtuten an vil reng mahse, man loh palh an nei thei a, hemi kawngah hian khawtlang mipui leh khawtlang hruaituten kan phâk chin chinah kan vilpui a, hetiang ti kan hriat chuan a rang lama thuneitute hrilh hriat vat hi kan ṭhat tlanna tur leh kan himna atan a pawimawh tih kan hriat thar a ṭul hle a ni.