Editorial:Fimkhur phah nan hmang i la

Nimin khan Lunglei Civil Hospital aṭangin nausen ni 4 chauha upa chu rukbo niin sawi a ni a, nausen rubotu nia an sawi hian thiam taka a chhungte bumin, an hmuh lai ngeiin a la chhuak a, nizan thleng khan nausen leh a rubotu hi hmuhlet a la ni lo a ni.

Naupang rukbo hi khawvel hmun hrang hrangah a thleng nasa em em a, kumtina naupang rukbo zat tak hi a dik tak hriat theih ni lo mahse International Labour Organization (ILO) chuan kumtin naupang maktaduai 1.2 vel hi chu rukbo an ni ṭhin angin a chhût a, a bikin ram retheiah naupang rukbona hi a thleng nasa a, hetihlai hian hmun dangah pawh a thleng fo bawk.

Naupang rukbote hi thil chi hrang hrang atan hman an ni ṭhin niin sawi a ni ṭhin a, hnathawk tur te, mipat hmeichhiatna hmanga sumdawnna atana hman tur te, hel pawl atan te, kutdawh tur te, dân kalha sumdawnna (drugs etc.)-a hman atan te leh thil dang dang atante hman an ni ṭhin a ni.

Tun hma deuh chuan naupang rukbo hi Mizoram chhungah a thleng ngai mang lo tih theih a ni a, tunah erawh naupang rukbo tum tih thawmte pawh hriat tur a awm chho ta zeuh zeuh a, hei vang hian naupang rukbo chungchangah hian mitin kan fimkhur a ngai zual tawh hle a ni.

Naupang rukbo chingte hi an thiam em em mai a, nimina thil thlengah pawh nausen chhungten ngaihṭhat lohna nei miah lovin, thiam takin an hmuh lai ngeiin a ru chhuak a ni a, naupang rukbo hmuhlet leh hi thil hautak tak a ni tawh ṭhin a, tin, hmuhlêt an ni hnuah pawh an rilru thlengin a khawih tawh ṭhin a, ngai awh leh tur chuan enkawlna ṭha taka enkawl zui an ṭul tawh ṭhin a, a pawi em em a ni.

Hetiang a nih avang hian naupang rukbona laka kan him theihna turin mipuite kan fimkhur thar a ṭul hle tih kan hriatchian a ngai takzet a, naupang chhungten naupang kan thlahthlam loh a, naupangte pawh hetiang miten an bum lohna tura zirtirna kan pek nasat pawh a ṭul takzet zet a ni tih i hre thar ang u.

Leave a Reply

This site uses Akismet to reduce spam. Learn how your comment data is processed.