Editorial:Lirthei tlan chak dan khuahkhirh a tul

Serchhip khawpui chhung kawngpui (NH-54) siamṭhat hna thawh mek a ni a, thui tak chu siamṭhat hna thawh zawh tawh niin, kawngpui siamṭhat tawh chin chu a mâm ṭha hle a, lirthei khalhtute tan pawh tlan a nuam tawh hle. Hetihlai hian kawngpuia lirthei tlan chak ta deuh hian mipui ngaimawh a hlawh nghal hle bawk a ni.

Hun engemawchen Serchhip khawpui chhung kawngpui chu siamṭhat lohin a awm a, lirthei khalhtute tan tlan chak hleih theih loh khawpin kawng khuar thûk tak tak a tam hman hle a, lirthei ṭha leh changkang tak tak khalhtute tan pawh an lirthei chak dan pho chhuah hleih theih lohin a awm a nih kha.

Tunah erawh kawngpuite a lo mâm ṭha a, Serchhipah pawh lirthei changkang leh ṭha tak tak a lo awm tam ve tawh bawk a, kawng ṭha chinah chuan lirthei khalhtute an tlan chak thei ta viau a, two wheeler aṭanga truck lianpui pui thlengin an ri fua fua tawh mai a, tar chaklo leh nau no pawm, chhangchhe deuh tan chuan kawngpui kân mai hlauhawm khawpa chaka lirthei tlan indawt zut châng a awm ta fo mai.

Lirthei chetsualnaa pawi liantham a thlenna hi a tlangpuiin lirthei tlan chak vang a ni fo ṭhin a, chak lutuka lirthei khalhtute hian an hmuhlawk loh thil a lo thlen thutin an lirtheite an control zo lo fo a, hei hian lirtheia chetsualna pawi tak a thlen phah fo a ni.

Kan kawngpuite mam ṭha viau mahse duhthusamin kan kawngpuite a la zau tawk lova, kan hmunhmaten a zir loh avangin ke-a kalte tana kalna tur bik awm lohna leh kawngpui hlat taka kalna awm lohna te a la awm tam a, kawngpui kânna hmun ṭhate kan la neih loh bawk avangin kan khawpui chhunga lirthei tlan chak hi mipui tan a la him lo lehzual hle a ni.

Hetiang a nih avang hian khawpui chhungah hi chuan lirthei khalhtuten keimahni bakah midang himna ngaihtuah chunga tlan chak dan tawk kan thiam a ṭul takzet zet a, thuneitute lam aṭang pawh hian mipuite himna tur ngaihtuaha khawpui chhunga lirthei tlan chak dan khuahkhirh dan kawng zawn nghal a ṭul hle niin a lang.

Tags: