Editorial:Nungcha humhalh kawngah inzirtir kan la ngai nasa

un hnaiah sa pela ram chhuak zingah inkâp palh an awm thu hriat tur a awm leh zauh ṭhin a, ṭhenkhat chuan vanduaithlak takin nunna an chân phah a, ṭhenkhat chu ram tui lei lovin an awm phah bawk a, a pawi ṭhin hle a ni.

Pi leh pute hun lai khân ram lama sa la thei ngaihsânna kha Mizo rilruah a bet tlat a, chuvangin Mizo mipate chu sa pela ramvâk ṭhin, thangkam ṭhin, sangha man ṭhin an ni deuh tlangpui a, tun thleng hian he rilru hi Mizo mipui tam tak thinlungah a la riak reng niin a lang a. Thingtlang mite chu sawi loh, khawpui mi, lehkhathiam tak tak, sawrkara hna sang tak tak chelhte pawh hian silai ṭha tak tak nena ramvah an la ching hle a, sa pêla ram chhuak ṭhin zawng zawng hian ramsa leh sava sa an ei châk vang leh, sum hmuhna atana sa pêl ṭhin an ni vek lem lo niin a lang a, mihring nunna atana nungcha dangte hlutzia an hriat tawk loh vang leh, an châkna hrikthlak nana ram chhuak ṭhin hi tam tak an awm ngei a rinawm.

Ramsa leh sava tihhlum hi dân phal loh thil a ni tih chu mipuiin kan hre khawp mai a, tin, sangha man danah pawh dân phal chin a awm a, heti chung hian ramsa leh nungcha dang humhalh kawngah hian kan ram hi kan la hnufûm hle a, mipuite hian nungchate hlutna hriatchian kan la mamawh hle niin a lang.

Kan ram hi thing leh mau leh, nungcha lamah a hausa a, khawvel hmun danga nungcha vâng takte leh hmun danga awm ve lote pawh kan ramah hian a awm tih mithiamten an sawi ṭhin a, amaherawhchu kan nungcha neihte kan suat nasat tawh avangin kan rama nungcha ṭhenkhat hi chu an mang (extinct) mai hlauhawm tak dinhmuna ding mekte pawh an awm a, chutihlai chuan kan rama sa peltuten kan hmuh zen zen tawh loh ramsa vâng, mang (extinct) mai theih dinhmuna ding mek kâp thei nih an la châk zawk tlat maite hi a manganthlak tawh hle a, chuvangin, helama mithiam leh sawrkar hian kan ram vanneihna leh, tuna kan dinhmun ṭhat lohzia te, nungcha suat vanga chânna leh tawrhna kan tawh theihte hi mipui rilrua tuh tura tun aia nasaa ṭan an lak a ṭul takzet a ni.