Zothlifim Logo
Loading ...

Mizoramin furpui kan thlena kan tawrh ziah chu leimin / leitawlh vanga harsatna thleng hi a ni a, hetiang hetianga ruahtui vanga leimin / leitawlh lo awm ṭhin hi khawvel ram dangte pawhin an tawk ve fo a, amaherawhchu, keini ang tlangram leh leilung nghet lo, ruahmanna fel tak neisa lova hmasawnna hna thawh ṭhinna hmun leh, ruahmanna felfai tak nei lova khawpui dinna hmunah hian kan tuar nasa ṭhin niin a lang.

Ruahtui avanga leimin / leitawlh te hi ṭhenkhat chu khuarel chhiatna ni bawk mahse a tam zawk mah hi chu mihringten kan insiamchawpah pawh a puh theih awm e. Leimin kan siamchawp dana langsar tak pahnih chu engemaw atana lei kan laih ṭhin leh tuihawk luanna mumal lo lutuk hi a nih a rinawm.

Tun ṭumah chuan tuihawk hi lo thlur bing bik ta ila. Tun hma lam aiin tuihawk hi kum telin kan nei tam telh telh a, hei hi a chhan ni ber chu ruahtui lo tlate lei chhunga an relh luh zung zung theih tawh lohna hmun kan siam tam tawh vang a ni a. Hei hi kan hmasawnnain a ken tel a ni. Khaw chhunga kawngpui dunga awmte chuan kawngpui leh kan in inkârte cement/alkatra hmangin kan zut man thlip thlep tawh a, tun hmaa lei chhunga ruahtui tam tak luh theih ṭhinna hmunah khan a lut thei tawh lova, tin, ruahtui dawh khawlna nei kan tlem tawh hle bawk a, hei vang hian ruahtui lo tla zawng zawng deuhthaw hi tuihawkah a chang ta a ni. Hetihlai hian kan tuihawkte luanralna tur mumal leh nghet ṭha kan siam loh avangin, tun hma zawng aia tam tawh tuihawk chuan kan ram leilung a ei hêk ta hem huam mai a, hei hian a hnuah leimin / lei tawlh a thlen zui ta ṭhin niin a lang.

Hetiang hi a nih avang hian tuihawk luanna mumal tak siam kawngah hian ṭan kan lâk hle a ngai a, tuihawk luanna ṭha kan neih loh chuan leimin pawh kan insiamchawp tam chho zel dawn niin a lang. Sawrkar thuneitute mai bakah khawtlang hruaitute pawh hian kan theihna chin chinah mahni huam chhungah chuan tuihawk luanna ṭha tam zawk siam tura ṭan kan lak a ṭul hle a, kan himna tur a ni tih hriain, ngaih pawimawha kan neih a ṭul tawh takzet a ni.