Sangha vuak/hrai

Ṭhal kan hmang chho mek a, tui hna a kâm a, lui tuite a tlêm chho leh ta hle mai a, tun ang hun chhoah hian lui leh kawrte hrang hrangah sangha man tura chhuak an awm tam chho leh ṭan mek a ni.

Tun hma aṭangin kumtin ṭhal tui tlem hun lai hi Zoram hmun hrang hrangah lui kal uar hun a ni ṭhin a, kan pi leh pute pawh khan tun ang hun chho hi sangha vuak hun atan an hmang ṭhin a, tun thleng hian tun ang hun chhoah hian sangha vua an awm thu hi hriat tur a la awm chho reng a ni.

Sangha vuak/hrai ṭhat lohzia leh mihringte a nghawn pawi theihzia kan inzirtir nasa a, YMA Branch hrang hrangte pawhin an huamchinah lui dung humhalh bik lai an nei deuh fur tawh a, heti chung hian sangha vua/hrai hi an la awm reng a, sangha vua/hrai zingah hian man chhuah lem loh hi a tam zawk an nih ngei a rinawm.

Sangha vuak ṭhat lohzia leh a nghawng pawi theihzia chungchanga mipuite hnena zirtirna kan inpe nasa chung leh, sawrkar phalloh thil a ni tih hre chunga sangha vua/hrai kan la awm fo ṭhin hi a pawi a, heng thil titute hian an thil tih chu sual a ni tih hre reng chungin an tisual lui tih a chiang a, chuvangin, YMA leh Forest Department lam hian ṭhal lai hian luidung lamah an mit lên ngun lehzualin, tun ang hun chhoah hian nasa zawkin ṭan la thei se a duhawm khawp mai. Sangha hrai/vua hriatchhuahte phei chu an chungah na taka hremna lek tura hmalak ngei nise, hei hian sangha vuak/hrai hi a tihtlem phah theih ngei a rinawm.