PHE Department-in an chhinchhiah danin, Mizoram khawpui hrang hranga mipuite hnena tui sem tur an lâkna chu a kum telin a tlêm telh telh hlawm tih hriat a ni a, kuminah phei chuan khawpui ṭhenkhat chuan tun ṭhal chhoah hian mipuite hnena tui sem chhuah tur tui lak tur pawh an nei daih thei ta lo hial a ni.
Tun hma aṭangin mithiamten kan ram ngaw kan tihchereu avang leh kan tuihnarte kan humhalh ṭhat tawk loh avangin kan tui hnate a kâm telh telh tih an sawi ṭhin a, amaherawhchu mipui tam takte hian hei hi hre mah ila, mutmawh hnar mawhah kan nei chuang lem lova, tuia harsatna kan tawh mai kan rin loh avangin tui hnar humhalh kawnga hmalak hi awm ve bawk mahse ngaih pawimawhna leh tih tak takna kan nei ngai lem lo niin a lang.
Tui chungchangah hian tuna kan ram dinhmun hi a ṭha lo hle tawh tih a hriat a, tunah hian a ṭhen chuan kumtluanin kan mamawh khawp tui kan la hmuh thei a ni mai thei a, a tam zawk hi chuan kan mamawh khawp hi fur lai chuan kan hmu thei ngei a, amaherawhchu kumtluana mamawh khawp tui hmu thei lo hi khaw engemawzat kan awm tawh a ni.
Tun anga kan tuihnâr humhalh kawnga kan ṭuan a fum chho zel a nih chuan kan tuchhuan lo awm leh tur chu sawiloh, tuna mihring la dam mekte damchhung la la hian kan rinphak baka nasa-in tui harsatna hian min tlakbuak ang tih a hlauhawm ta hle. Tuia harsatna kan tawh hun a thlen meuh chuan tui hna siamṭha leh tur chuan hun rei tak nasa taka beih a ngai tawh dawn a, chuvangin, mihring nunna atana thil pawimawh ber pakhat, tui-a harsatna leh manganna kan tawh lohna turin, tun aṭang hian kan tuihnâr humhalh kawngah mitin hian hma kan lâk a ṭul takzet tawh a ni.