Naktukah Serchhip Bial MLA By-election-a vote tlate chu chhiar a ni dawn a, tarlan tawh ṭhin angin Serchhip bial by-election hi by-election lo neih tawhte nen a inang lova, inthlanna neih hma aṭangin mite ngaihven a hlawh a, political party hrang hrangte pawh by-election lo neih tawh ṭhin ang lo takin an ṭang nasa hlawm hle a nih kha. Naktuka inthlannaa vote tla chhiar tur pawh hi Serchhip bial mipui mai ni lo, Zoram hmun hrang hrang leh ram danga Mizo tam takin an ngaihven mek a ni a, naktuk tlai lamah chuan Serchhip bial MLA thar tur hi a hriat theih tawh dawn a, chutihlai chuan Covid-19 hri lêng mek avangin inthlannaa tlin lawmna kawng zawh leh punkhawm chu Election Commission of India-in a khap a, hei hi kan himna atan kan zawm tlân a ṭul dawn tih kan hriat a ṭul hle a ni.
Tunhnaiah India rama state ṭhenkhatah chuan inthlan neih avangin hri lêng a nasat phah hle niin sawi a ni a, Mizoramah ngei pawh tun dinhmunah hri leng hian zual lam a pan zel niin a lang bawk a, hei vang hian tute pawh tlingin, tling lo se, party mipuite a inhawrkhawm lo zawnga kan chet a ṭul a, chu chu kan himtlanna tur a ni tih kan hriat a ṭul a ni.
ECI pawhin he inthlanna neih avanga hri a darh lohna tur tur leh, inthlannaa inhnamhnawihte an him theihna turin inkaihhruaina mumal tak a siam a, he inkaihhruaina ang hian vote pawh thlak a ni tawh a, vote chhiar hunah pawh ECI inkaihhruaina siam angin khauh taka kal a ni dawn a, mipuite pawh an awmhmun aṭanga vote tla-te an lo hriat zung zung theihna turin media hrang hrangah vote tlak dan puan chhuah nghal zel turin ruahmanna siam a ni a, mipuiten mahni awmhmun aṭangin result kan hre ve nghal zel thei dawn a ni. Chuvangin hri lêng laka kan himtlan theihna turin vote chhiar kaihhnawihah hian mipuite punkhawm loh hram i tum ang u.