Zothlifim Logo
Loading ...

Kumtina kan hman ṭhin Faina Hapta chu kan hmang leh mek a ni a, kumin chu kum danga tihdan ang lo takin Faina Hapta chhunga nitina hun hman dan tur hrang hrang duanlawk a ni a, kum danga faina kawnga inzirtirna awm mumal vak ngai lohna – Plastic hman nawn theih loh, sangrang pan / Polythene lam chi paih mai mai lo tura inzirtirna te, Bawlhhlawh ṭawih thei leh ṭawih thei lo leh plastic lam chi thliar hranga Bawlhhlawh bawm hranga paih tur te, plastic bawlhhlawh khawl inzirtirna te, bawlhhlawh hman nawn theih ṭangkai zawka hman dan zir a ṭulziate inzirtir a ni a, hei hian faina kawnga ke kan penna kawngah hmasawnna min thlen ngei a beiseiawm hle a ni.

Mizote hi faina kawngah hma kan sawn tawh hle a, kan khawpui hrang hrang bakah thingtlang lam thlengin India ram pum huap pawhin faina kawnga lawmman dawng pha hi kan awm nual tawh a, hei vang hian India ramah pawh faina kawnga hmasawn pawl tak kan ni tih a lang chiang hle a ni.

Hetihlai hian faina kawngah hma sawn tawh viau mah ila, hmabak leh hmasawnna zel tur kan la nei a, tun hmaa faina kawnga hma kan sawnna tura khaw chhung hnim samfai leh bawlhhlawh chhar khawm hmang ringawta hma kan lak lai leh tuna faina kawnga hmalak dan tur kan inzirtir dante hi chu a inthlau tawh hle a, amaherawhchu tuna kan thlen tawh chin aṭang hian inzirna tur kan la nei tam hle a, faina kawnga hma kan laknaah hian hlo tûr hmang lo zawng te, kan environment tichhe lo tur leh a siamṭha tur zawng zawka hma lak chhoh dan kan zir hi kan mamawh chho ṭan tawh niin a lang.