Zothlifim Logo
Loading ...

Nimin khan Chief Secretary Lalnunmawia Chuaungo hovin kumin Krismas, Kumthar leh Puja (Dusshera, Diwali leh a dangte) lo thleng turah halpuah, halmawi, silailem mu nei chi leh sky lantern khap chungchang sawrkar mi pawimawhte leh tlawmngai pawl hruaituten Police Hqrs., Aizawlah an rel a, heng hâl theih hrang hrangte hi mihring hriselna atana thil pawi thei leh Covid-19 hri len lai phei chuan nghawng ṭha lo tak nei thei a nih avangin khap tlat ni se, an ti a ni.

Kûtpui lai, a bikin Krismas leh Kumthar vuakveta hâlpuah leh halmawi lam chi hâl hi kum engemawzat chhung chu Mizoramah khap a lo ni tawh a, khap a ni ṭhin chungin kumtinin Krismas leh Kumthar vuakvetah halpuah leh hâlmawi lam chi hâl thawm hriat tur leh hmuh tur a awm ziah thung a, nikum lam khan na zawkin sawrkarin hma la-in he dân bawhchhia mi 22 lai chu thubuai siamsak an ni nghe nghe a ni.

Hetihrual hian sakhaw dang betuten kûtpui an hman changin hâlmawi lam chi nasa takin an hâl ṭhin a, hei hian halpuah leh hâlmawi hâl châk ve tak tak Mizo mipui ṭhenkhat beng tithlep fo ṭhin a, kuminah chuan Assam Rifles, BRTF, BSF leh sipai hmun aṭanga heng hâl chite hi hâl a nih lohna turin khapna order pek nise tiin nimina Chief Secretary hova ṭhukhawm chuan an rel a ni.

Kumina halpuah leh hâlmawi lam chi hâl khapna thupek hi a kenkawhna hmasa ber tur chu Assam Rifles, BRTF, BSF leh sipai hmun dangte hi a ni dawn a, heng hmunte hi sawrkarin a khuahkhirh ṭhat theih chuan tualchhung mipuite lakah chuan he thupek kenkawh hi tun hma aiin a awlsam phah ngeiin a rinawm.