Tun hnaia Samagra Shiksha, Mizoram kaltlanga Middle School leh High School-a thawk tur CSS Hindi Teacher (Contractual basis) lâkna tura interview neih hun tur chungchangah sawrkar thutlukna mumal ni chiah lo thuthang eng eng emaw thehdarh a awm tih hriat a ni a, hei hian ṭul lo-ah diltute a tibuai tiin sawrkar chuan thuchhuah siamin hemi chungchang sawifiahna hi a tichhuak a ni.
Sawi tawh ṭhin angin, tunlai khawvel changkang tawhah media a chak tawh a, hei hian kawng tam takah awlsamna min thlen a, hetihlai hian a hmang thiam tawk lo leh, suahsual tumna rilru pu-a hmang ṭhinte hian mi tam tak buaina leh harsatna an thlen ṭhin a, a pawi hle a ni.
Tun hmaa thuthar hriatna atana Radio, TV leh Chanchinbute chauh hman a nih lai ang kha a ni tawh lova, tunah chuan naupang tê aṭanga Upa Pawl member-te thlengin kan kutah media chak tak kan hûm fir fer tawh a, journalist senior tak takte leh whatsapp hmang thiam ngawr ngawrte pawh thu thehdarh lamah chuan kan thiltihtheihna a inchen rual tawh a ni.
Hetianga thuthar thehdarh lama mitin deuh thawin thiltihtheihna kan neih tawh lai hian thuthar puan darh kawngah sawrkar pawhin rin bik, mipui hriata thuthar puan chhuahna kawng bik a la nei zel a, kan thuthar hmuhte a chhuahna azira a rintlak leh rintlak loh mipuiten kan thliar thiam a ṭul telh telh dawn niin a lang a, thuthar rintlak leh rintlak loh kan thliar thiam loh chuan kan buai lohna turah kan buaiin, harsatna kan tawk fo thei dawn a, hetianga ṭul lova buaina leh harsatna kan tawh fo lohna tura kan fimkhur thiam hi a ṭul telh telh dawn a ni.