December ni 10 khan State Level Sub-Committee on Fire Prevention Committee chu ṭhukhawmin, kum 2022-a Fire Prevention week hman hun atan February 7 – 12 inkar an ruat a, kum 2022 kangmei vên thupui (Theme) atan “Kangmei chhuak tur vên mitin mawhphurhna” tih chu thlan a ni.
Mizoramah chuan kumtinin, khua a ṭhal chhoh hian ram pum huapin kângmei kan tuar nasa thei hle mai a, kangmei kan tawrh dan hi mipui leh sawrkar tan buaipui tham a ni kumtin ṭhin a, tun ṭhal chhoa kangmei laka invênna atan pawh sawrkar chuan tun aṭangin inbuatsaihna kalpui ṭan leh tawhin, ruahmannate pawh a siam chho ṭan leh tawh a ni.
Mizoramin kângmei a tawrh nasat chhoh hun chu lo/leipui hâl hun, February thla aṭanga ruahtui a tlak tak tak hma thleng hi a ni ṭhin a, heng hun loah pawh hian kângmei chu kan tuar ve zeuh zeuh tho a, amaherawhchu, khaw awmdan leh boruak awmdanin a zir avangin kangmei chhuak nasa erawh a thleng ngai mang lo thung a ni.
Tunah hian thlasik kan hmang chho mek a, heng hunah hian ram kâng chu tuar ngai meuh lo mah ila, heng hunah hian in kâng sawi tur a awm fo ṭhin thung a, a chhan chu khaw vawt vanga intihlumna atana mei kan chhem aṭang te, electric heater kan hman nasat vanga electric kalsual avang te, kan ran vulhna hmun aṭangten kangmei kan tichhuak fo a, heng kawngah hian fimkhur a ṭul chho leh dawn a, sawrkarin kangmei veng kawnga inbuatsaihna a kalpui rual hian mipui lam pawh hemi kawngah hian kan fimkhur chhoh a ṭul ve nghal a ni.