Zothlifim Logo
Loading ...

Nimin khan Chief Minister Zoramthanga, MNF Party president ni bawk chuan Kolasib-a MNF Kum 60 tlin champha a hmanpuinaah, SEDP sem turin an inbuatsaih mek tih sawiin, sawrkar kum tharah sem an tum thu a sawi a, hetah hian SEDP dawng tur thlangtu atan an party mite an ni dawn nia ngaih theih tura sawiin, “Unit tinin in thlan tur lo en ula….” tiin a sawi a ni.

Political party-ten inthlan dawna an manifesto-a an tihtum an ziahte hi sawrkarna an chan hnua sawrkar sum hmanga a taka an kalpui a nih chuan an party thiltum pawh nise, sawrkar programme / scheme / project a ni tawh a ni. Congress-in inthlan hma-in NLUP an tiam a, sawrkarna an chan hnua a taka an kalpui khan sawrkar flagship programme a ni a, SEDP pawh hi MNF-in inthlan dawna mipuite a tiam a ni a, hei pawh hi sawrkar sum hmanga an kalpui chuan sawrkar programme a ni tawh a ni.

Hetianga mipuite hnena thil sem tur sawrkar programme hrang hrangah hian sawrkarna chelhtu party mi leh sa-te an thu thei hle a, sawrkara nihna nei lo, sawrkar kut ke ni lote hi beneficiary tur thlangtute an ni fo ṭhin a, hei hi kan ramin kalphunga kan neih tawh, ngaia kan neih tawh niin a lang.

Chutihlai chuan hetianga sawrkar sum hmanga mipuite chawikânna tur leh hamṭhatna tur kalpui tur programme/scheme-a sawrkara nihna nei lo political party mi leh sa-te hnena thuneihna sâng tak pek hi sawrkar kalphung atana thil him lo leh sawrkar kal sualna thlen thei a ni a, hei bakah hian sawrkar sum hmanga mahni party mi leh sa induhsak bikna hi sawrkar ṭha kalphung tur niin a lang lo.