Mizoramin kum 2000 chho aṭanga kumtina kan hman ṭhin Kangmei Ven Hapta (Fire Prevention Week) 2022 chu February ni 7 – 14, 2022 chhunga Mizoram puma hman turin nimin khan Chief Minister Zoramthanga chuan a hawng a, hemi rual hian District hrang hrangah pawh Kângmei Ven Hapta hawnna hun hi hman a ni a, hapta hman chhung hian kangmei ven kawnga inzirtirna kawng hrang hrangin neih a ni dawn a ni.

Khawvel ram ṭhenkhatah chuan boruak lum lutuk vangin kangmei a chhuak ṭhin tihte kan hria a, hetihlai hian kan rama Kangmei chhuak ṭhin hi mihring kuthnu vanga chhuak a ni deuh ber a, chuvangin, kan rama kangmei chhuah chhan tam zawk hi chu mihringte kan fimkhur loh vang leh misual ṭhenkhatte vang a ni deuh ber a ni.

Kangmei ven hapta hi ṭhangkhat lian chuang zet kan lo hmang tawh a, Kangmei chhuakin pawi a khawih nasat theihzia leh, kan chhehvel ram kâng kan tawrh nasat theihzia inzirtirna pawh kum engemawzat kan kalpui tawh a, heti chung hian kumtina kangmei kan tawrh dan en hian kângmei chhuak hian ziaawm lam a pan hret hret chuang lo niin a lang a, nikumah phei kha chuan ruah a sur har bawk avangin ram kâng kan tuar nasa hle a, kum danga la tih ngai loh, kangmei chhuak ṭhelh nan helicopter hman a ni hial a nih kha.

Chuvangin kan dinhmun thlirin, mipui zingah kangmei tihchhuah pawi ti lem lo, kangmei tichhuak lo tura fimkhur tum lem lo engemawzat an la awm niin a lang a, heng mite rilru hi hmin a nih hma chuan kangmei chhuak hi kumtin kan la buaipui zui zel a ngaih a rinawm a, chuvangin, hemi kawnga inzirtirna kan neih ṭhin hi zirtirna pek mamawh takte leh zirtirna dawng tur dik takte hnena a thlen ngei theih dan tur kan ngaihtuah a ṭul niin a lang.