Tunhnaia Mizoram titi luah tam ber chu khawchhak aṭanga Mizoram kaltlanga dân lova kuhva ro tawlh chungchang hi a ni a, tunhnaia Assam sawrkarin kuhva rah tawlhruk titawp tura hma a laknaah kuhva rah tawlhnaa Assam lama a khaipa pawla ngaih Abu Majumdar-a in an dapnaah a nau pakhat chu police-ten an kahhliam thu leh Abu Majumdar-a chu a bikbo hman thu te Assam aṭanga chhuak chanchinbu pakhat chuan tarlangin, Abu Majumdar-a hi Delhi-a Assam Chief Minister leh Mizoram Chief Minister-ten zanriah an kilhonaah Mizoram Chief Minister team-ah a tel niin an tarlang hial a, he thuthang chungchangah hian Chief Minister Office leh MNF party-te chuan thuchhuah siamin, Mizoram CM hruai a nih loh thu an sawi a ni.
Tun thla ni 2-a Chief Minister-in thuthar lakhawmtute a hmachhawnnaah zawhna chhângin Chief Minister chuan, Kuhva chauh ni lo, bungraw dangho reng reng, Myanmar aṭanga dân loa Mizorama lût chu sawrkarin tihtawp a tum tih a sawi a, hemi hma hunrei tawh tak aṭang khan kuhva tawlh chungchang hian sawi zui a hlawh tawh a, sawrkara thuneitu lian tak takte pawh he dân lova sumdawnnaah hian an inrawlh nia sawirikte pawh a awm nasa hle a, heng thute hi kan ram hruaitute beng pawh thleng tawh ngeiin a rinawm.
Hetihlai hian tun thlengin dân lova kuhva rah tawlha sumdawnna titawp tur hian Mizoram sawrkar chuan hmalakna lian tham tak a neih thawm hriat tur a la awm lova, hetianga kan ram chhunga dân phal loha sumdawnna lian tak kalpui a ni tih ram hruaituten an hriat tawh hnua a titawp tura an hmalakna mipuiten tun thlenga hriat tur an la nei lo hian nghawng ṭha lo tak a nei thei a, nghawng ṭha lo zawk a neih hmaa he dân kalha sumdawnna titawp tura sawrkarin na taka hma a lak thawm hriat hlan a nghahhlelhawm hle a ni.