Inrinni khan MJA, Serchhip District member-te chuan Mat phai, Tuisen zaua MLA Fund aṭanga cheng nuai 8 hmanga kawng siam a hmunah an en a, hetah hian kawng siamtute chuan MJA member-te hi lo dawngsawngin, an hnathawhte a hmunah fanpuiin, an hnathawh dante an lo hrilh a ni.
He hna thawktute hian an sum hmuh aṭanga ngaihtuahin an hnathawh hi ṭha an tiin, thawk tam an inti a, an hnathawhte pawh mipui hriata pholan an zak lo niin a lang a, a hmuna tlawhtute pawhin ṭha an tihpui thu an sawi a ni.
Mizoramah hian sawrkar sum hmangin mimal leh pawl, Department leh company-ten hna hrang hrang an thawk ṭhin a, heng hmasawnna hnathawh hrang hrangahte hian a thawktuten an hnathawh ṭha an tih tawk leh, a hnu thlenga an chhuanpui zui khawpa hna thawh ṭha a awm ṭhin a ni.
Chutihrualin, hemi letling thawk hian hnathawktuten an hnathawh midangin an hmuhpui leh an hriatchianpui an duh vak lohte pawh a awm thei a, tuten emaw, Social media vela an hnathawh thlalak leh estimate amount-te an tarlansak pawh, intihmualphonaa ngaite pawh an awm thei âwm e.
Sawrkar sum hmanga hnathawhnaah chuan a tlangpuiin estimate awmsa aṭangin hna thawh a ni ṭhin a, estimate-ah hian a hna neitu/thawktute hlêp tur bilh tel sa a ni ṭhin a, chuvangin, sawrkar sum hmanga hna thawh tam zawk hi chu a thawktute pawhin an hnathawhna aṭanga hlawh nei chunga ṭha taka an hnate thawk zo thei tura ngaih an ni. Chuvangin, sawrkar sum hmanga hna thawktute hian kan hnathawhte hi tlangzarh ngam leh mipui hriata puanzar ngam tur hian thawh zel i tum teh ang u.